Алматы, BAQ.KZ тілшісі. Алматы облысы Райымбек ауданы Нарынқол ауылында 40-тан астам тұрғын үй, Халыққа қызмет көрсету орталығы және басқа да ғимараттар қолданысқа берілді.
Тұрғындарға үй кілттерін облыс әкімі Амандық Баталовтың өзі салтанатты түрде табыстады.
Айта кетсек, Қазақстан Республикасы Президентінің 2018 жылғы 31 наурыздағы «Алматы облысының әкімшілік-аумақтық құрылысындағы өзгерістер туралы» № 653 жарлығымен Райымбек ауданы қайта құрылған еді.
Аудан орталығы - Нарынқол ауылы. Биылғы жылдың 1 қазанындағы мәлімет бойынша, аудандағы халық саны 40 мыңға жуықтаған.
Жаңадан құрылған Райымбек ауданын қайта қалпына келтіруге бюджеттен 17,9 млрд теңге қаржы жұмсалыпты.
Соның ішінде тұрғын үйлер, тұрғын үймен біріктірілген учаскелік полиция пункттері тұрғызылған.
Білім, денсаулық сақтау, спорт және басқа да салаларда маңызды нысандар салынып, қолданыстағылары күрделі жөндеуден өткізілген. Жалпы аудан бөлінгелі бері 7 ауылдың ішіндегі 65 шақырым жол жөнделген. Сонымен қатар аудан орталығы Нарынқол ауылының жалпы ұзындығы 31,5 шақырым көшелеріне асфальт төселген.
Бұдан басқа да ауыл шаруашылығында, шағын және орта бизнесте және экономиканың негізгі салаларында мемлекеттің қолдауымен қыруар шаралар атқарылып жатыр.
