Нұр-Сұлтан, BAQ.KZ. Жаңа оқу жылы басталардың алдында елімізде жыл сайын дәстүрлі түрде білім саласының қызметкерлері бас қосып, тамыз конференциясын өткізеді.
Онда өңірдегі білім жүйесінің өткен оқу жылының қорытындылары айтылып және келешектері белгіленеді.
Шығыс Қазақстан облысында өткен пленарлық отырыстың жұмысына аймақ басшысы Даниал Ахметов пен ҚР Білім және ғылым министрлігінің өкілдері, жоғары оқу орындарының ректорлары мен мұғалімдер қатысты.
Жиналыс басталмас бұрын делегация өкілдері Шығыс Қазақстан облысының әкімімен бірге start-up көрмесін тамашалап, «Digital East – болашаққа қадам 2019» атты халықаралық IT-форумда облыс әкімінің грантына ұсынылған ұсынылған жобалармен танысты. Сондай-ақ, колледж студенттерінің қолыннан шыққан ағаш пен металдан жасалған құрал-жабдықтардың көрмесін көріп, WorldSkills сайысының халықаралық талаптарына сәйкес келетін «Мехатроника» лабораториясын тамашалады.
Облыстық мамандандырылған математика, информатика физика саласындағы дарынды балаларға арналған мектептің оқушылары жобалардың бірін таныстырды. Олар оқыту кешеніне дронды бағдарламалау мен мектептегі роботты техника курсына ұшу аппараттарын пилотсыз режимде басқаруды енгізуді ұсынды.
Өз кезегінде балаларды мұқият тыңдаған Даниал Ахметов, облыстағы әрбір мектепке дрон сатып алынатынын және осы курстың жүргізілетінін атап өтті. Бұдан бөлек жиын барысында білім басқармасының басшылығына алгоритимдік ойлауды дамыту мақсатында бағдарламалауды әр тілде жүргізуді тапсырды. Сондай-ақ, компьютерлік жүйені заманауи білім беру жүйесіне қарай икемдеуді жүктеді.
Ал мұғалімдер қосымша курстарға барып, IT-бағыты бойынша білімдерін жетілдіретін болады.
Айта кетейік, соңғы екі жылдың көлемінде 1125 мұғалім курстан өтіп, барлық 655 мектеп жаңа компьютерлер мен интерактивті құралдармен жабдықталды. Сондай-ақ, техникалық және кәсіптік білім беру жүйесіне баса назар аударылуда. Келесі жылы World Skills стандарты бойынша колледждерді жабдықтау жұмыстары жалғасын табады. Оған «Жас маман» республикалық жобасының ресурстары тартылады. Бұл мақсатта облыста техникалық және кәсіптік білім беру жүйесін дамыту үшін кешенді жоспар әзірленген. Соған сәйкес техникалық және кәсіптік білім беру саласының маңызы артатын болады.
Естеріңізге сала кетейік, 23,8 мың түлектің 6,7 мыңы немесе 30%-ы колледждерде оқуға ниет білдірген. Ал биылғы оқу жылында 7,9 мың бала колледждерде тегін білім алуға мүмкіндік алды. Оның ішінде өткен жылы оқу бітірген жастар да бар. Осы мақсатта облыстық бюджеттен қажетті мамандарды даярлау үшін мемлекеттік тапсырысты орындауға 6,2 мың орын бөлінді. Бұдан бөлек республикалық бюджеттен Нәтижелі жұмыспен қамту және жаппай кәсіпкерлікті дамыту бағдарламасы аясында 1730 орын қарастырылған.
Алайда, жиын барысында аймақ басшысы мемлекеттік тапсырыс бойынша оқытылатын мамандықтарға сұраныс жоқ екенін айта келе, өңір экономикасын дамыту жолында осы саланың қызметкерлері қажет болатынын атап өтті. Мәселен, биыл электр жабдықтарын жөндейтін электр-слесарь, машинист, тракторист, техник-технолог сынды жұмысшы мамандықтарға оқитын студенттердің аз болыпты. Сондай-ақ, мұндай жағдай жоғары оқу орындарында да орын алған. Мысалы, математика, физика пәндерінің мұғалімдері мен ветеринар, өсімдік шаруашылығы, мал шаруашылығы саласы бойынша оқуға бірде-бір түлек ниет білдірмепті. Сол себептен жаңа оқу жылынан бастап қала мен аудан әкімдері, білім басқармасы, жұмыспен қамту және әлеуметтік бағдарламаларды үйлестіру басқармасы өңірдегі ЖОО-мен бірлесіп, кәсіби бағдарлау жұмыстарын қолға алуды жоспарлап отыр. Осылайша, мемлекеттік тапсырыс негізінде оқытылатын сұранысқа ие мамандықтарға деген оқушылардың қызығушылығын оятпақ.
Өңірдегі мектептерде жаңартылған мазмұндағы білім беру жүйесіне көшу ісіне баса назар аударылуда. Бұл бағытта да ауқымды жұмыстар атқарылды. Мәселен 5 379 мұғалім курстан өтіп, жаңартылған мазмұндағы 1,5 млн оқулық сатып алынды. Қорыта айтқанда, соңғы 4 жылдың көлемінде 25 мыңнан астам мұғалім жаңартылған бағдарлама бойынша курстан өтті. Сонымен қатар, үштілді білім беру бағдарламасы бойынша да жұмыстар атқарылуда. Аймақ басшысы, 2019-2021 жылдары көптілділікті дамыту мақсатында кешенді жоспар жасалғанын атап өтіп, аталмыш бағдарлама аясында француз, неміс тілдері де оқытылатынын жеткізді. Алдағы уақытта мектепке дейінгі, жалпы орта, техникалық және кәсіптік білім беру жүйесінде сабақ беретін 3700 мұғалім қайта даярлаудан өтеді.
Сондай-ақ, білім беру кешендерінің инфрақұрылымын дамыту да актуальды болып тұр. 2022 жылға дейін республикалық бюджеттің есебінен 3,6 мың орынға арналған 5 мектеп салынады. Бұл нысандар Семей, Риддер қалалары мен Абай ауданы Қарауыл ауылында бой көтереді. Биыл 2900 орындық 2 мектеп қолданысқа беріледі. Соның бірі Өскеменде салынса, екіншісі Тарбағатай ауданы, Ақжар ауылында салынады. Бұдан бөлек жоспарға сәйкес Семейдегі мектептің инновациялық жобасы қолға алынады. Онда оқушылар әлемдегі үздік технологияларды меңгереді. Ал облыс орталығында 700 орындық мамандандырылған дарынды балаларға арналған математика мектебі бой көтереді. Оның ішінде 320 бала аудандар мен қалалардан келеді.
Тамыз конференциясының соңында Даниал Ахметов Шығыс Қазақстан облысындағы білім беру саласының үздік қызметкерлерін марапаттады. Көкпекті ауданы, Самар ауылындағы Ж.Болғанбаев орта мектеп-лицейінің ұжымы 2019 жылдың ең үздік білім беру мекемесі атанды. Мектеп директоры Баян Бағисоваға аталмыш мекемені дамыту мақсатында 34 млн теңгенің сертификаты ұсынылды.
«Техникалық және кәсіптік білім беру жүйесіндегі ең үздік ұйымы» аталымын Семейдегі электротехникалық колледждің ұжымы жеңіп алды. Колледж директорына 34 млн теңгенің сертификаты табысталды. Ал Аягөз ауданындағы С.Ғаббасов орта мектебінің ағылшын тілі пәнінің мұғалімі Бахтигүл Асылхановаа «Үздік тренер 2019» аталымын иеленіп, 500 мың теңге көлемінде сыйақы алды. Бұдан бөлек 10 мұғалімге Өскеменде салынған үйлердің кілттері табысталды.
