Бұл туралы үкімет отырысында Ұлттық экономика министрі Әлібек Қуантыров мәлімдеді, деп хабарлайды BAQ.KZ тілшісі.
Биыл қаңтар-қазан айларының қорытындысы бойынша Қазақстан экономикасының өсу қарқыны 4,9% жетті. Оның ішінде нақты сектор – 3,8%-ке, ал қызмет көрсету саласы – 5,4%-ке өсті. Салалар арасында ең жоғары өсуді құрылыс, сауда, ақпарат және байланыс, сондай-ақ көлік көрсетті. Негізгі капиталға салынған инвестициялардың өсу қарқыны - 12,6%, – деді министр.
Министрдің мәлімдеуінше, инвестициялар ағыны көлік және қоймалауда – 58%-ке, денсаулық сақтауда – 40%-ке, саудада – 38%-ке, білім беруде – 18%-ке, ауыл шаруашылығында – 8,7%-ке, өнеркәсіпте – 8,3%-ке өсті.
Өңірлер арасында ең жоғарғы өсім Маңғыстау, Абай, Түркістан және Павлодар облыстарында байқалды.
Алдын ала қорытынды бойынша 2023 жылғы қаңтар-қыркүйекте сыртқы сауда тауар айналымы 2,4%-ке өсіп, 102 млрд долларға жетті. Экспорт 57 млрд-тан астам долларды құрап, оның ішінде өңделген тауарлар экспорты 18 млрд долларға жетті. Тауарлар импорты 44 млрд-тан астам долларға өсті, – деді Қуантыров.
