Нұр-Сұлтан, BAQ.KZ тілшісі. Үкімет отырысында Сауда және интеграция министрі Бақыт Сұлтанов қай өңірлерде азық-түлік бағасының өсуі байқалғанын айтты.
Министр баяндағандай, жыл басынан бері әлеуметтік маңызы бар азық-түлік тауарларының бағасы 6,3%-ға өскен, оның ішінде 6 тауарлық позиция 5,3 пайыздық тармақты немесе жалпы өсімнің 84%-ын құрады.
Бұл маусымаралық кезеңде бағаның өсуі байқалатын көкөністер, сондай-ақ импортқа тәуелді өнімдер және жоғары экспорттық сұранысы бар тауарлар.
Жылдық мәнде бағаның өсуі 11,8%-ды құрады. Биылғы жылдың 5 айының қорытындысы бойынша әлеуметтік маңызы бар азық-түлік тауарларына бағаның айтарлықтай өсуі Түркістан облысында – 9,4%, Нұр-Сұлтан қаласында – 8,5% және Алматы қаласында – 6,0% тіркелді, - деді Сұлтанов.
Бағаның ең төмен өсімі Батыс Қазақстан облысында – 5,7%, Ақмола облысында – 5,6% және Қарағанды облысында 5,2% байқалады.
Азық-түлік бағасының өсуі бүкіл әлемде байқалады. Біріккен Ұлттар Ұйымының Азық-түлік және ауыл шаруашылығы құрылымының деректеріне сәйкес, ағымдағы жылдың мамыр айында бағалар өткен жылдың сәйкес кезеңімен салыстырғанда 40%-ға өсті. Бұл соңғы 10 жылдың рекордтық көрсеткіші болып табылады, - деп түсіндірді ол.
Бақыт Сұлтановтың айтуынша, баға өсімі біздің көрші елдерде де байқалады. Мәселен, Ресеймен салыстырғанда бізде көптеген тауар бойынша баға өсімі төмен.
Бізде ішкі нарықтағы сұраныс пен ұсыныстың теңгерімсіздігіне әкелетін қосымша проблемалар байқалады. Мысалы, картоп бойынша Ауыл шаруашылығы министрлігінің мәліметтеріне сәйкес отандық өндіріс ішкі тұтынуды 108%-дан астам қамтамасыз етеді. Сонымен қатар картоптың тауарлық өндірісінің көлемі бар болғаны 2,0 млн тоннаны немесе жалпы түсімнің 47%-ын құрайды, - деп атап өтті Сауда министрі.
Қалған көлемі тауар айналымында жүйелі түрде қатыспайды. Өйткені ол халықтың жеке қосалқы шаруашылықтарында өндіріледі.
