Нұр-Сұлтан, BAQ.KZ. Маңғыстау облысында бір уақытта әскери-теңіз күштері мен теңіз жаяу әскерлерінің оқу-жаттығулары өткізілді. Жаттығу жоспарына сәйкес, арнайы бөлімшелер дағдарыс аумағындағы шартты қарулы қақтығысты шешу бойынша тактикалық-атыс іс-қимылдарын орындады.
Қорғаныс министрлігі баспасөз қызметінің хабарлауынша, оқу-жаттығудың негізгі мақсаты еліміздің Батыс өңіріндегі қауіпсіздікті қамтамасыз ету бойынша бірлескен іс-қимылдарды пысықтау болды. Қарулы күштерден басқа, маневр жасауға «Бекет-2020» ведомствоаралық кешенді оқу-жаттығуы шеңберіндегі іс-шараларға қатысқан басқа да мемлекеттік органдардың құрылымдық бөлімшелері тартылды.
Арнайы операция күштері оқу-жаттығу барысында ұшқышсыз ұшу аппараттарын қолдана отырып, жергілікті жерді үздіксіз барлады. Бұл заңсыз қарулы құрамаларды дер кезінде анықтау мен әскери бөлімшелерді алдағы іс-қимылдардың бағыты туралы бағдарлауға мүмкіндік берді, - делінген хабарламада.
Әскери теңізшілер теңіздің экономикалық қызмет нысандары мен жағалауды қорғау бойынша іс-шаралар өткізді. Зымыранды-артиллериялық катерлердің күштері теңізден шартты қарсыластың шабуылына тойтарыс берді. Ал теңіз жаяу әскері шекара маңындағы ауданда қарулы қақтығысты оқшаулау, оның ішінде босқындар лагерлерін өрістету, олармен қажетті ақпараттық және психологиялық жұмысты ұйымдастыру мәселелерін пысықтады.
Бірінші кезекте арнайы операциялар күштері мен арнайы мақсаттағы бөлімшелерде белсенді түрде енгізіліп жатқан армиялық тактикалық атысты қолдана отырып, арнайы бөлімшелердің іс-қимылы жекелей көрсетілді. Әскери қызметшілер армиялық тактикалық атыс жаттығуларын орындау барысында атыс қаруын, сондай-ақ, пышақ пен сапер күректерін қолданды, - деп хабарлады ведомстводан.
Бұл ретте, оқу-жаттығудың белсенді кезеңін Қорғаныс министрі, генерал-лейтенант Нұрлан Ермекбаев пен Маңғыстау облысының әкімі Серікбай Тұрымов қадағалады.
