Бұл туралы Қолжазбалар және сирек кітаптар ұлттық орталығының директоры Жандос Болдықов Марал ишанның Кенесары ханға сыйлаған Құранын ҚМДБ-ға тапсыру рәсімінде айтты, деп хабарлайды BAQ.KZ тілшісі.
Бұл кітап жарық көргеніне 2 ғасырдан асты. Әрбір кітаптың физикалық, биологиялық өзгерісі болады. Сол себепті, бұл кітапты орталыққа алып, толығымен қалпына келтіру жұмыстарын жасаймыз. Ол 2 айдай уақыт алады, – деді Болдықов.
Маман реставрациялық жұмыстар аяқталған соң Құранның көшірмесін жасау жұмысы басталатынын айтты.
Өзіміздің орталықта 4 дана көшірмесін жасаймыз. Оны республика аймағындағы үлкен мешіттерге береміз және оны ғылыми айналымға енгізу жұмыстары басталады. Себебі әрбір сирек, құнды кітаптың ашатын тың ақпараттары бар, – деді ол.
Болдықов Құранның ішінде Марал ишанның жазған сөздері болуы мүмкін екенін айтып, осы жәдігер үлкен жаңалықтар бастамасы болатынына сенім білдірді.
