2025 жылдың соңына дейін Алматы облысының Кеген және Райымбек аудандары арқылы өтетін республикалық маңызға ие 145 шақырым жолға орташа жөндеу жұмыстары жүргізіледі, деп хабарлайды BAQ.KZ.
Учаскелердің бір бөлігін биыл аяқтау жоспарланып отыр.
Алматы облысына іс-сапар аясында Көлік вице-министрі Сәтжан Аблалиев белгілі туристік орындарға, соның ішінде Шарын каньонына, Қайыңды және Көлсай көлдеріне, сондай-ақ, өңірдің шалғай аудандарына апаратын автомобиль жолдарын аралады. Сапар барысында Жалаңаш, Кеген және Нарынқол ауылдары арқылы өтетін жалпы ұзындығы 150 шақырымнан астам учаскелер қаралды.
Райымбек ауданындағы Текес және Нарынкөл ауылдары арасындағы 15 шақырымды құрайтын «Кеген – Нарынкөл» республикалық жол учаскесінде жүргізіліп жатқан орташа жөндеу жұмыстарына инспекция жүргізілді. Аталған жұмыстар Қазақстанның Даму Банкі қаржыландыратын ауқымды орташа жөндеу бағдарламасы шеңберінде жүргізілуде. Жоғарыда тілге тиек етілген учаскені биыл жыл соңына дейін ашу межеленген.
Жалпы, осы бағдарламаның шеңберінде 2025 жылдың соңына дейін Алматы облысының Кеген және Райымбек аудандарында 145 шақырымды құрайтын автомобиль жолдарына орташа жөндеу жоспарланған: «Кеген - Нарынқол» жолы — 89 шақырым, «Көкпек - Жалаңаш» жолы — 21 шақырым, «Көкпек – Кеген – Түп» жолы — 35 шақырым.
Вице-министр Сәтжан Әйтенұлы туристік нысандар мен шалғайдағы елді мекендердің көліктік қолжетімділігін жақсарту өңірдің әлеуметтік-экономикалық дамуына ықпал ететінін, сонымен қатар, экономикаға және жергілікті халықтың өмір сүру деңгейін арттыруға тікелей әсер ететінін атап өтті.
