Келісімшарттық міндеттемелердің орындалмауына байланысты Каспий маңы бассейніндегі 8 барланған учаске мемлекетке қайтарылды, деп хабарлайды BAQ.KZ.
Үкімет отырысында Премьер-министр Олжас Бектенов келісімшарттық міндеттемелер орындалмайтын және жұмыс жүргізілмейтін Каспий маңы бассейні шегіндегі барлау учаскелерін мемлекетке қайтару мәселесін көтерді. Қабылданып жатқан шаралар туралы энергетика вице-министрі Еран Ақкенженов баяндады.
2023-2024 жылдары Каспий маңы бассейнінде осындай 8 учаске анықталды. Аталған 8 келісімшарт бүгінде тоқтатылды. Осы жылы 4 учаске аукционға қойылды, олар бойынша жыл соңына дейін қол қою жоспарлануда. Қалған 4 учаске келесі жылы шығарылады немесе олар бойынша келісімшарттарға тікелей қол қоюды жоспарлап отырмыз, — деді Ерлан Ақкенженов.
Энергетика министрлігіне аталған жұмысты жеделдету тапсырылды.
