Нұр-Сұлтан, BAQ.KZ. Қарағандыда карантин талаптарын бұзып, мейрамханаға жиналғандарды тарату үшін полиция ғимаратты қоршауға алды деп хабарлайды облыстық Полиция департаментінің баспасөз қызметі.
7 тамыз күні «109» телефонына қаладағы мейрамханалардың бірінде көптеген адам, көліктердің жиналғандығы туралы хабарлама түсті. Оқиға орнына құрамында полиция, санэпидемистанция және Қарағанды қалалық әкімдігінің қызметкерлері бар мобильді топ шықты. Факті расталды. Көңіл көтеретін орында көліктер мен адамдардың көптігіне байланысты, мобильді топ қызметкерлері қоғамдық қауіпсіздікті қадағалап, ғимаратты қоршауға алуға үшін қосымша полиция жасағын шақырды, – делінген хабарламада.
Қарағандылық тәртіп сақшылары мейрамхананың кіші залында 38 жастағы азаматтың ұйымдастыруымен сүндет той өтіп жатқанын анықтаған.
Тойға 40 адам қатысқан. Ал үлкен залда 57 жастағы қала тұрғынының ұйымдастыруымен қыз ұзату тойы өткізіліп жатқаны белгілі болды. Ол тойға шамамен 350 адам шақырылған. Полиция қызметкерлері мобильді топтың қабылдаған іс-шараларының арқасында мерекелік шара тоқтатты, – деп хабарлайды облыстық ведомстводан.
ПД-нің баспасөз қызметі хабарлағандай, аталған фактілер бойынша әкімшілік хаттама толтырылып, Санитарлық-эпидемиологиялық қызметтің қарауына жіберілді.
Айта кетсек, бұған дейін хабарлағанымыздай Қарағанды облысының әкімдігінде карантин шектеуін сақтамай, той жасаған шенеунікке қатысты мәлімдеме жасады.
Аталған мемлекеттік қызметшіге қатысты арнайы тексеру тағайындалады, карантин шектеуі сақтамау фактісі расталған жағдайда, атқаратын лауазымынан босатуға дейінгі ең қатаң шара қабылданады. Сондай-ақ, санитарлық нормалардың бұзылуына байланысты іс-шара тоқтатылғанын, ұйымдастырушыларға әкімшілік айыппұл салынатынын хабарлаймын, – деген болатын Қарағанды облысы әкімінің баспасөз хатшысы Марина Шаповалова.
