Алматы, BAQ.KZ. И.С. Жекенова атындағы Қалалық клиникалық жұқпалы аурулар ауруханасының жаңадан салынған филиалы кешеден бастап COVID-19 вирусын жұқтырған пациенттерді қабылдай бастады. Бұл туралы Алматы қаласы Қоғамдық денсаулық сақтау басқармасы хабарлады.
Қазір мұнда 43 науқас бар. Жұқпалы аурулар ауруханасы дәрігерлер үшін BI-Industrial құрылыс компаниясы рекордтық мерзімде (18 күн) салған модульдік кешенде орналасқан. Модульдік кешенде палаталарда теріс қысым жасайтын желдету жүйесі жұмыс істейді: вирустары бар ауа палатадан тыс жерге енбейді, ол арнайы зарарсыздандыру жүйелеріне түседі,-делінген хабарламада.
Сондай-ақ, палаталарда герметикалық есіктер орнатылған, кәріз жүйесін тазалаудың ерекше жүйесі жұмыс істейтіні де айтылған.
Бұл аурухана 280 төсек-орынға есептелген. Құрылымына 9 клиникалық бөлімше, 28 төсек-орындық реанимация бөлімшесі, далаға жеке шығатын 10 бір орындық палаталар, бес орындық динамикалық бақылау палаталары бар қабылдау бөлімшесі кіреді,-делінген хабарламада.
