ІІМ мылтық, тапанша тапсырғандарға 345 мың теңге төлейді

2 Мамыр 2023, 12:05
1686
Бөлісу:
ІІМ мылтық, тапанша тапсырғандарға 345 мың теңге төлейді
Фото: semeynews.kz

ІІМ Әкімшілік полиция комитетінің қару айналымын бақылау бөлімінің бастығы Асылбек Ыдырысов акция аясында қару-жарақтарға қанша теңге төленетінін айтты, деп хабарлайды BAQ.KZ тілшісі.

ІІМ жыл сайын халықтан заңсыз сақталған қару-жарақтарды сатып алу бойынша акция өткізеді.

Биыл мұндай акция елімізде 10 сәуірде басталған болатын.

Өтемақы мәселелеріне келетін болсақ, қаруды өтемді тапсырғаны үшін төлемдер мөлшері олардың түріне, техникалық күй-жайына байланысты әр бірлігі үшін (10 АЕК-тен 100 АЕК-ке дейін) 34 мыңнан 345 мыңға дейін әр түрлі болады, - деді бөлім бастығы брифингте.

Сөзінше, сыйақы көлемін әр облыстық, қалалық және аудандық полиция органдарында құрылатын комиссиялар белгілейді.

ІІМ қандай қаруға қанша теңге төлейді:

100 АЕК-ке дейін немесе 345 мың теңгеге дейін – автоматты ойық қаруды тапсырған азамат ала алады.

Ойық ұңғылы мылтықтар мен карбиндер үшін – 172 мың теңгеге дейін.

Тапаншалар мен револьверлер үшін - 138 мың теңгеге дейінгі мөлшерде төлеу болжанады.

Тегіс ұңғылы мылтықтардың әрбір бірлігі - 103 мың теңгеге бағалануы мүмкін.

Травматикалық тапаншалар үшін – 34 мың дейінгі мөлшерде төлеу болжанады.

Төлемдер мөлшерін айқындау кезінде комиссиялар қарудың техникалық жай-күйін ескереді және тиісті санат беріледі, олар барлығы - 3 санатқа бөлінеді.

Айтуынша, 1-санатқа жатқызылған қару үшін төлем ұсынылатын құнының 100%-ы, 2-санатқа 70%-ы, 3-санатқа 30%-ы есебінен жүргізіледі.

Ал сыйақы төлеу мерзімі – 1 ай. 

Криминалист-маманның қорытындысы негізінде атыс қаруы, оқ-дәрі немесе жарылғыш заттар болып танылмаған, ІІМ БДБ-ның «Тіркелген қару» және «Криминалдық қару» есебінде тұрған қару-жарақтарға, қолдан жасалған, сондай-ақ тегіс ұңғылы, газды және жарақат салатын патрондарға сыйақы төленбейді, - деп түсіндірді Асылбек Ыдырысов.

Өзгелердің жаңалығы