Индустрия және инфрақұрылымдық даму министрлігінде тұрғындарды сапалы ауыз сумен қамтамасыз ету мәселелеріне арналған жиын өтті, деп хабарлады BAQ.KZ.
Құрылыс және тұрғын үй-коммуналдық шаруашылық істері комитеті төрағасының орынбасары Әзімбек Нәлібаев төрағалық еткен басқосуға жауапты мекеме басшылары мен жергілікті атқарушы органдардың өкілдері қатысты.
Бүгінде еліміздің 4 764 ауылдық елдімекенінде сапалы ауыз сумен жабдықтау жұмыстары толығымен аяқталды. Қалған 1 533 ауылдың 496-сында орталықтандырылған сумен жабдықтау құрылысы жоспарланған болса, тұрғындар аз қоныстанған 1 037 елді мекенде жергілікті бюджет қаражаты есебінен кешенді блок-модульдер орнатылмақ.
Жалпы алғанда 2025 жылға қарай еліміз бойынша сапалы ауыз суға қолжетімділікті 100 пайызға дейін арттыру көзделіп отыр. Бұл – «Қуатты өңірлер – ел дамуының драйвері» ұлттық жобасы шеңберінде жүзеге асырылмақ.
Өткен жылдың қорытындысы бойынша елімізде сумен жабдықтау қызметтеріне қолжетімділік 96 пайызды құрады. Оның ішінде, қалаларда 98 пайыз болса, ауылдық елдімекендердің үлес салмағы – 93 пайыз. Қазіргі таңда Атырау, Солтүстік Қазақстан, Қызылорда және Маңғыстау облыстарындарындағы қала тұрғындары 100 пайыз сапалы ауыз сумен қамтамасыз етілген, – деп атап өтті Комитет төрағасының орынбасары Ә.Нәлібаев.
Оның айтуынша, алдағы уақытта сумен қамтамасыз ету көрсеткіштері төмен өңірлерге басымдық беріліп, тиісті қаражат бөлінбек. Олардың қатарында Қостанай, Солтүстік Қазақстан және Жамбыл облысындағы ауылдық елдімекендер бар.
