HR Enbek платформасындағы қызметкерлер туралы пікірлер қалай жұмыс істейді? – Еңбек министрлігі түсіндірді

Қазақстанда жұмыс іздеуге арналған жаңа цифрлық мүмкіндік пайда болды. Енді HR Enbek платформасында қызметкерлер туралы ұсынымдар, пікірлер қалдыруға болады. Бұл – бұрынғы ұсынымхаттардың электронды нұсқасы, бірақ анағұрлым ыңғайлы әрі заманауи форматта.

Жаңашылдық туралы ҚР Еңбек және халықты әлеуметтік қорғау вице-министрі Бахтияр Жазықпаев кеңірек айтып берді. Оның сөзінше, жүйе өткен жылдан бері іске қосылып, қазірдің өзінде тәжірибеде қолданылып жатыр.

Не өзгерді?

Біз жұмыс берушілерге қызметкерлер туралы ұсынымхат сияқты пікір қалдыруға мүмкіндік беретін құралды іске қостық. Бұл процесті цифрландыру және жеңілдету үшін жасалды, – деді ҚР Еңбек және халықты әлеуметтік қорғау вице-министрі Бахтияр Жазықпаев.

Енді ұсынымдар тікелей жүйеде рәсімделіп, қызметкердің цифрлық профилінде сақталады.

Қалай жұмыс істейді?

Жүйенің басты ерекшелігі – қауіпсіздік пен ашықтық. Пікірді жұмыс беруші оның қарамағында ресми түрде жұмыс істеген қызметкерге ғана қалдыра алады. Барлық әрекет электрондық цифрлық қолтаңба арқылы расталады, ал ұсынымды жариялау үшін қызметкердің міндетті түрде келісімі қажет.

Жүйе қызметкердің еңбек қатынастарында болғанын тексереді, ал жұмыс беруші өз әрекетін электрондық цифрлық қолтаңбамен растайды. Ең бастысы – ұсынымды қызметкердің жеке профилінде жариялау үшін оның келісімі міндетті түрде алынады, – деп атап өтті ол.

Бұл не үшін қажет?

Барлық пікірлер адамның цифрлық профилінде сақталып, жұмысқа орналасу кезінде басқа жұмыс берушілерге қолжетімді болуы мүмкін. Бұл жұмыс іздеуді жеңілдетіп, үміткер туралы көбірек ақпарат алуға мүмкіндік береді.

Қызығы, жүйе екіжақты жұмыс істейді. Қызметкерлер де өздері еңбек еткен компаниялар туралы пікір қалдыра алады. Алайда бұл мүмкіндік әзірге толық қолжетімді емес, тестілеуден өтіп, жетілдіріліп жатыр.

Бұл жерде де ұқсас тетік қолданылады – қызметкер верификациядан өтеді. Бірақ бұл функция әзірге көпшілікке ашылған жоқ. Біз оның жұмысын талдап, кейін әрі қарай дамыту туралы шешім қабылдаймыз, – деді министрлік өкілі.

Еңбек нарығына әсері

Баспасөз жиынында цифрландыру тақырыбы да қозғалды. Жазықпаевтың айтуынша, жұмыс орындарының жаппай қысқаруы күтілмейді.

Біздің болжам бойынша, еңбек нарығының 87 пайыздан астамына цифрландыру тікелей әсер етпейді. Негізгі ықпал біліктілігі төмен жұмыс орындарына тиеді, – деді ол.

Мамандықтар бойынша нақты статистиканы кейінірек жариялау жоспарланып отыр.

Еске салсақ, Еңбек және халықты әлеуметтік қорғау министрлігі Қазақстанда азаматтардың мұқтаждығын бағалаудың цифрлық жүйесі қай кезеңде екенін түсіндірді. белгілі болғандай, Қазақстанда әлеуметтік жәрдемақы тағайындау кезінде несиелер де ескеріледі.