Нұр-Сұлтан, BAQ.KZ. «Qazaqstan» және «Qazsport» телеарналары көрсетіп жатқан кәсіпқой бокс кешінің басты жекпе-жегі басталды, деп хабарлайды ҚазАқпарат.
Жапонияның Сайтама қаласында өтіп жатқан кәсіпқой бокс кешінің басты жекпе-жегін өткізу үшін отандасымыз Геннадий Головкин (41-1-1, 36 КО) шаршы алаңға шықты.
Ол шаршы алаң иесі Риота Муратамен (16-2, 13 КО) орта салмақтағы WBA Super, IBF және IBO нұсқалары бойынша чемпиондық титулдар үшін жұдырықтаспақ. Кәсіпқой бокс кешін «Qazaqstan» және «Qazsport» телеарналары тікелей эфирде көрсетуде.
Трансляция Нұр-Сұлтан уақытымен 15:00-де басталды. Онлайн qazaqstantv және qazsporttv.kz сайты мен «Qazaqstan.tv» мобильді қосымшасы арқылы да көрсетіледі.
Total Sport сайты бұған дейін Геннадий Головкин бұл кештегі жекпе-жек үшін 5 млн доллар көлемінде кепілдендірілген гонорар және оған қоса PPV-дің 70% үлесін алатынын жазды. Бұл шамамен 12-15 млн доллар. Еске салсақ, кеше «GGG» 40 жасқа толды.
Осыған орай Президент Қасым-Жомарт Тоқаев Геннадий Головкинді туған күнімен құттықтады.
