Ерекше қорғалатын табиғи аумақтарда ақы төлеу тәртібі өзгереді

19 Маусым 2024, 12:37
263
Бөлісу:
Ерекше қорғалатын табиғи аумақтарда ақы төлеу тәртібі өзгереді
Фото: Артём Чурсинов - архив

Мәжіліс ерекше қорғалатын табиғи аумақтарды пайдаланғаны үшін төлем алу тәртібін жетілдіру туралы заңды Салық кодексіне ілеспе түзетулермен екі оқылымда қабылдады, деп хабарлайды BAQ.KZ тілшісі.

Түзетулерге Парламент депутаттары бастамашы болды.

Заң жобасын екінші оқылымда депутат Еділ Жаңбыршин таныстырды.

Негізгі ерекше қорғалатын табиғи аумақтарды пайдалану саласындағы заңнаманы одан әрі жетілдіруге бағытталған. Оның аясында ерекше қорғалатын табиғи аумақтарды пайдаланғаны үшін бюджетке түсетін төлемдерді есептеу және төлеу тәртібін реттеу алынып тасталады. Сондай-ақ мемлекеттік органдардың құзыреті айқындалады, - деді ол.

Сонымен қатар әкімдіктерге 2026 жылдың 1 қаңтарына дейін мемлекеттік энергия өндіруші ұйымдардың ысыраптарын субсидиялау құқығы беріледі.

Бюджет және Орман шаруашылығы кодексіне, «Ерекше қорғалатын табиғи аумақтар туралы», «Электр энергетикасы туралы», «Қазақстан Республикасындағы жергілікті мемлекеттік басқару және өзін-өзі басқару туралы» заңдарға өзгерістер енгізіледі.

Ілеспе заңда Салық кодексінен бюджетке түсетін ерекше қорғалатын табиғи аумақтарды пайдаланғаны үшін төлемді есептеу және төлеу тәртібін реттейтін нормалар алынып тасталады. 

Сондай-ақ «электрондық лотерея билеті» ұғымы енгізіледі. Тұрмыстық аспаптарды және тұрмыстық электр техникасы аспаптарын, сондай-ақ олардың құрамдастарын өткізетін өзге де тұлғалар (дистрибьюторлар) қосымша құн салығын төлеуден босатылады. Бүгінгі күні осындай жеңілдік осы тауарларды өндірушілер мен олардың уәкілетті өкілдеріне берілген.

Өзгелердің жаңалығы