Энергетикалық сусындардан зиянды консерванттар табылды – комитет

22 Маусым 2022, 11:03
1434
Бөлісу:
Энергетикалық сусындардан зиянды консерванттар табылды – комитет

Нұр-Сұлтан, BAQ.KZ. Санитариялық дәрігерлер энергетикалық сусындардағы  консерванттардың қауіпті артуын анықтады.

Бұл туралы Санитариялық - эпидемиологиялық бақылау комитеті хабарлады.

Санитариялық эпидемиологиялық бақылау комитеті Қостанай облысының сауда желісінде сатылатын өнімдердің қауіпсіздігін мониторингтеу  қорытындысы бойынша «Кофеинмен және тауринмен Flash up energy» (163,3 мг/л) және «Monster Energy» (173,72 мг/л) алкогольсіз энергетикалық газдалған сусындардағы натрий бензоатының (Е211) артқанын анықтады, - делінген хабарламада.

Сусындарды өндірушілер «Балтика» «Сырақайнату компаниясы» ЖШҚ (Ресей Федерациясы) және «Refresco Benelux B.V» (Нидерланды Корольдігі) компаниясы болып табылады. Азық-түлікті ұзақ уақыт сақтау үшін, тағамдық қоспалар консерванттар ретінде қолданылады.

Өнімдер партиясы сатылымнан шығарылды, ал жеткізушіге ішімдіктерді сату айналымынан алып тастау бойынша шаралар қабылдау тапсырылды. 

Жүктілік кезінде құрамында натрий бензоаты бар тағамдар мен сусындарды қолдану ұсынылмайды, өйткені бұл зат аллергиялық реакциялар тудыруы мүмкін. Кейбір адамдарда консерванттың артық болуы локализацияланған қышу, жөтел, қызару, бөртпе, ісіну сияқты жеңіл белгілерді тудыруы мүмкін. 

Натрий бензоаты организмде жиналуы мүмкін, бұл өздігінен қауіпті. Бұл әсіресе жасөспірімдерге қатысты. 

Комитет Ресейдің «Тұтынушылардың құқықтарын қорғау және адамның әл-ауқатын бақылау қызметіне» (Роспотребнадзор) осы өндірушілердің өнімдерін зертханалық күшейтілген бақылауға алу туралы хабарлама жіберді. 

Естеріңізге сала кетейік, «Тұтынушылардың құқықтарын қорғау туралы» заңның 6-бабына сәйкес, ДСМ Санитариялық-эпидемиологиялық бақылау комитеті тұтынушыларды адам денсаулығы мен өміріне қауіп төндіретін тамақ өнімдерінің анықталғаны туралы хабардар етуге құқылы.

Өзгелердің жаңалығы