Енді жеке куәлікті 5-10 минут ішінде алуға болады - Мусин

29 Маусым 2022, 17:55
1166
Бөлісу:
Енді жеке куәлікті 5-10 минут ішінде алуға болады - Мусин

Жақында қазақстандықтар жеке куәлікті 5-10 минуттың ішінде ала алатын болады, деп жазады  өзінің Facebook-тегі парақшасында Цифрлық даму, инновациялар және аэроғарыш өнеркәсібі министрі Бағдат Мусин.

Біз Ішкі істер министрлігімен бірге біртіндеп арнайы терминалдарды қолданысқа енгіземіз, сөйтіп құжаттарды миграция мамандарына жүгінбей-ақ, терминал арқылы ресімдеуге болады, – деп жазды министр.

Сондай-ақ ол 28 маусым күні Үкімет отырысында мемлекеттік қызметтерді цифрландыру барысы туралы айтып, Сенат депутаттары алдында жаңа заң жобасы бойынша баяндама жасағанын жазды.

Заң жобасында инновация, цифровизация және ақпараттық қауіпсіздік саласына өзгерістер мен онлайн-қызметтерді жылдамырақ енгізуді көздейтін іс-шаралар қарастырылған.

Бірінші кезекте, мемлекеттік аппаратты бюрократиядан арылту, яғни адами факторды азайтып, қызмет көрсету уақытын қысқартуға бағытталған. Платформалық модель мен бірыңғай архитектура қалыптастыру арқылы шығыны көп шашыраңқы ақпараттық жүйелерді реттеп, қажетсіз базаларды қысқартуға болады. Нәтижесінде, мемлекеттік қызметтерді көрсету жылдамдығы артып, азаматтарға да, мемлекеттік органдарға да қолайлы және тиімді жағдай жасалады.

Шалғай ауылдарда тұратын қазақстандықтар үшін «цифрлық нүктелер» ашылады. Бұл мәселені Қазпоштада жұмыс істеп жүргенде көтерген едім. Бәріне белгілі, Қазақстанның түкпір-түкпірінде, тіпті ең шалғай ауылдарында Қазпоштаның ғана бөлімшелері бар, сондықтан осы бөлімшелерде тек пошта қызметтері емес, мемлекеттік қызметтерді де ұсынылатын болады. Әйтпесе тұрғындар қаладағы немесе аудан орталығындағы ХҚКО-ға баруға мәжбүр.

Цифрлық құжаттар мәселесіне келсек, заңда цифрлық құжаттар қағаз нұсқамен тең дәрежеде қолданылатыны туралы норма қарастырылған.

Сондай-ақ жуырда қазақстандықтар жеке куәлікті 5-10 минуттың ішінде ала алатын болады. Біз ІІМ-мен бірге біртіндеп арнайы терминалдарды қолданысқа енгіземіз, сөйтіп құжаттарды миграция мамандарына жүгінбей-ақ, терминал арқылы ресімдеуге болады,-дейді Бағдат Мусин.

Оның сөзінше, алыс елді мекендерді байланыспен қамту мәселесі бойынша байланыс желісін электр жеткізу желілерінің бағандары арқылы өткізу мүмкіндігін қарастырып жатырмыз. Яғни электр жеткізу желілері бар жерге байланыс та өткізіледі. Ал, мұндай мүмкіндік болмаған жерлерге спутник арқылы жеткізетін боламыз.

Өзгелердің жаңалығы