Нұр-Сұлтан, BAQ.KZ тілшісі. Бұл туралы Индустрия және инфрақұрылымдық даму вице-министрі Берік Қамалиев Президент жанындағы ОКҚ-да өткен брифингте айтты.
Нұр-Сұлтан қаласы мен өңірлерді «сәулелі принцип» бойынша байланыстыратын жоғары жылдамдықты 4 жолақты автомагистраль құрылысы жалғасады. Көкшетау, Павлодар және Қарағанды бағытындағы жұмыстар аяқталды. Қазіргі уақытта құрылыс жұмыстары Қарағандыдан Қапшағайға дейінгі учаскеде іске асырылуда. Биыл ұзындығы 363 шақырым болатын Қарағанды-Балқаш учаскесіндегі негізгі жұмыстарды аяқтау көзделген, - деді Қамалиев.
Ол Халықаралық қайта құру және даму банкі қаржыландырып жатқан «Балқаш-Бұрылбайтал» учаскесін реконструкциялау барысында коронавирус пандемиясына байланысты жекелеген шетелдік компаниялар жұмысын жалғастыра алмады және қазір аталған учаскелерде басқа мердігерлер жұмыс істеп жатқанын айтты.
Жалпы Мемлекет басшысы тапсырғандай, «Қарағанды-Балқаш-Алматы» дәлізін толықтай 2023 жылы аяқтаймыз. Қайта жөндеуден кейін қозғалыстың есептік жылдамдығы шамамен 120 км/сағ құрайды, тиісінше Нұр-Сұлтаннан Балқаш көліне дейін 6-7 сағатта жетуге болады. Алматыдан жету үшін де дәл осындай уақыт қажет, - деді ол.
