Нұр-Сұлтан, BAQ.KZ. Нұр-Сұлтан қалалық полиция бөлімінің Сарыарқа ауданының полиция қызметкерлері жедел-іздестіру шаралары барысында аңшы қаруы бар 37 жастағы елорда тұрғынын ұстады. Ол бұған дейін де сотты болған, деп хабарлайды полиция департаментінің баспасөз қызметі.
Ер адам түнде кілем тазалау шеберханасына кіріп, шаңсорғыш, екі ұялы телефон, компьютер мониторын ұрлаған. Күдіктінің өзі жұмыс істеп, түні бойы қызмет еткен станцияда жеке заттарын тексеру кезінде полиция қызметкерлері кілем тазарту шеберханасынан ұрланған заттарды, сонымен қатар аңшылық мылтықтары мен оқ-дәрілері бар портфельді тапты.
Алдын ала зерттеу барысында табылған мылтықтың қолдан жасалынғандығы анықталды.
Қазақстан Республикасы Қылмыстық кодексінің «Ұрлық» және «Қаруды, оқ-дәрілерді, жарылғыш заттар мен жарылғыш құрылғыларды заңсыз алу, беру, өткізу, сақтау, тасымалдау немесе алып жүру» баптары бойынша сотқа дейінгі тергеу жүргізілуде, - деп мәлімдейді құқық қорғау органының қызметкерлері.
Ұсталған адам уақытша ұстау изоляторына қамалды. Полиция қызметкерлері ұсталған адамның бұрын осыған ұқсас қылмыстарға қатысы бар-жоғын анықтап жатыр.
