Елімізде такси жүргізушілері мен курьерлер ресми жұмыспен қамтылғандар қатарына жатқызылады. Бұл туралы Мәжілісте өткен «үкімет сағатында» Еңбек және халықты әлеуметтік қорғау министрі Тамара Дүйсенова айтты, деп хабарлайды BAQ.KZ тілшісі.
Еңбек нарығы либеризацияланады. Бұл икемді жұмыспен қамтылудың барлық түрін, соның ішінде платформалық жұмысты да тануды білдіреді. Осы мақсатта тәуелсіз жұмыскер, яғни табыс әкелетін, еңбекпен айналысатын, бірақ тиісті уәкілетті органдарда «ресми мемлекеттік тіркеуі жоқ тұлға» ұғымы енгізілген болатын. Егер тәуелсіз жұмыскерлер өз қызметін онлайн платформаларға қосылу немесе жария шарт жасасу арқылы атқаратын болса, онда бұл жұмыскерлер ресми жұмыспен қамтылды деп танылады, - деді министр.
Мысалы, Яндекс Такси платформасына қосылған такси жүргізушілері, Яндекс GO және Glovo онлайн платформасына қосылған курьерлер осы санаттағы жұмыскерлердің қатарына кіргізіледі.
Бұл жұмыскерлер үшін онлайн платформалар операторлары салық агенттері болып, арнаулы салық режимдеріне сәйкес жұмыскердің пайдасына салық төлемдері мен әлеуметтік жарналарды аударып отырады. Бұл жағдайда тәуелсіз жұмыскерлер жалдамалы жұмыскерлер сияқты республикалық бюджеттен, мемлекеттік әлеуметтік қорлардан және сақтандыру компанияларынан әлеуметтік төлемдер алуға құқылы. Ал тиісті аударымдар болмаған жағдайда оларда заңдарда белгіленген ең төменгі мемлекеттік кепілдіктер ғана беріледі, - деп түсіндірді Еңбек министрлігінің басшысы Мәжілісте айтқан сөзінде.
