Алдағы үш жылда елімізде 190 мектеп салынады – Шәмшидинова

15 Сәуір 2019, 12:08
2840
Бөлісу:
Алдағы үш жылда елімізде 190 мектеп салынады – Шәмшидинова

Нұр-Сұлтан, BAQ.KZ тілшісі. Елімізде 2021 жылға дейін 190 мектеп салынады. Бұл ең алдымен үш ауысымда жұмыс істейтін мектептердің проблемасын шешуге бағытталып отыр. Бұл туралы ҚР Білім және ғылым министрі Күләш Шәмшидинова Үкімет үйінде өткен баспасөз мәслихатында айтты.

Министр еліміздегі мектептердің инфрақұрылым мәселесін сөз етіп, мектеп жетіспеушілігі проблемасын шешу үшін алдағы үш жылда 190 жаңа мектеп салынатындығын жеткізді.

«Бұл ең алдымен үш ауысымда жұмыс істейтін мектептердің проблемасын шешуге бағытталып отыр. Сондай-ақ, апаттық жағдайда орналасқан және оқушылардың орны жетіспейтін мектептердің мәселесін шешетін болады. Сонымен қатар, жер сілкінісіне байланысты біраз мектепте жөндеу жұмыстарын өткіземіз», - деді ол. 

Сонымен қатар ол, мектептегі білімнің сапасы мұғалімге байланысты екендігін айта келе, мұғалімдердің кәсіптік деңгейін көтеруге бағытталған жұмыстар жүргізілетіндігін жеткізді.

«Алдағы үш жылда, яғни 2019 жылды қосқанда 144 мың мұғалім қайта даярлау курстарынан өтеді. Сондай-ақ, 82 мың сынып жетекшісі мен психологтар да осы курстан өтеді. Бүгінгі таңда ұстазға да, балаға да, ата-анаға да психологтардың көмегі өте қажет. Сондықтан психологтарда қайта даярлау курсынан өткіземіз. 15 мыңдай кәсіптік білім беру саласының мамандары және 2,4 мың ЖОО-ның ұстаздары да осы курстан өтеді. Бұлар негізінен педагог мамандарын даярлайтын оқу орындарынан өтеді», - деді министр.

Күлаш Шәмшидинова жиын барысында ұстаздарға педагогикалық көмек көрсету қажеттігін және осы бағытта жүйелі әдістемелік жұмыстар  атқарылып жатқанын айтты.

«Жаңа оқу жылы қарсаңында әдістемелік жұмыстардың қазақ және орыс тіліне қосымша ағылшын тіліндегі бөлімі ашылады. Сонымен қатар, методикалық көмекті жақындату мақсатында ең алдыңғы мектептердің есебінен 800 жуық «тірек мектептері» анықталып отыр. Сол мектептердің мұғалімдері арасынан біз методикаға, бағалау жүйесіне, жерттеу жұмыстарына байланысты тренерлерді дайындап отырмыз. Әрбір тірек мектебінің жанында 10 шақты жетекші мектептер бар, солармен бірлесіп жұмыс істейтін болады», - деді ол.

Бұған дейін Күләш Шәмшидинова 1 маусымнан бастап қай санаттағы мұғалімдердің жалақысы көтерілетінін айтқан болатын.



Өзгелердің жаңалығы