Нұр-Сұлтан, BAQ.KZ. Англияның Мэн аралында Grand Swiss халықаралық шахмат турнирі аяқталды. Бұл FIDE турнирлерінің ең ірі жарыстарының бірі – 11 турға созылатын ұзын қашықтықты сайыс, деп хабарлады қазақстандық шахмат федерациясы.
Турнирге әлемнің 40-тан астам елінен 150 мықты шахматшы қатысып, олардың қатарында әлемдік деңгейдегі Магнус Карлсен, Фабиано Каруана, Левон Аронян есімді белгілі шахматшылар болды. Қатысушылардың орташа рейтингі 2605-ті құрады.
Турнирде қазақстандық шахматшы Динара Сәдуақасова сәтті өнер көрсетті. Әйелдер арасында ол үнді спортшысы Харика Дронаваллимен 1-2-ші орынды бөлісті.
"Бұл өзімді көрсетуге тамаша мүмкіндік болды. Күн сайын мықты ойыншылармен ойнайсың. Бар күшімді салдым - дегенмен зор қашықтық қой. Менің барлық қарсыластарым әлемдік шахмат элитасы – "алтыжүздіктер" тобындағы гроссмейстерлер болды. Бұл құрам мені қорқытқан жоқ, керісінше, өзімді тексеруге мүмкіндік тудырды", - деді Динара.Grand Swiss турнирінен кейін Динараның рейтингі 2505 болды. Енді ол әлемнің ең мықты шахматшылары арасында 11-орында тұр. Бұл қазақстандық әйелдер шахматы үшін жоғары нәтиже.
