Мәжіліс депутаты Айгүл Құспан Қазақстан мен Ресей арасындағы ынтымақтастық жайлы пікір айтты, деп хабарлайды BAQ.KZ тілшісі.
Депутат атап өткендей, Ресей президенті Владимир Путиннің мемлекеттік іссапары ХХІ ғасырдағы тату көршілік және одақтастық туралы шарттың 10 жылдығы қарсаңында өтіп отыр. Бұл құжатқа 2013 жылы 11 қарашада қол қойылған болатын.
Бүгін екі ел басшылары осы 10 жыл ішіндегі ынтымақтастықтың қорытындысын жасап, мемлекеттеріміздің стратегиялық әріптестікті дамытудағы күш-жігерін ерекше атап өтті. Қазақстан мен Ресей ынтымақтастығы кең ауқымды мәселелерді қамтиды. Бұл экономикалық және өнеркәсіптік, инвестициялық, энергетикалық, көлік, мәдени-гуманитарлық ынтымақтастық және т.б. Сондықтан осы салалардағы жетістіктерді және болашаққа жоспарларды тізіп шығудың өзі көп уақытты талап етеді. Ең бастысы, бұл стратегиялық ынтымақтастық және оның прагматикалық және нақты сипаты бар. Мәселен, мәдени-гуманитарлық ынтымақтастыққа келетін болсақ, бұл – айталық, Қазақстанның оңтүстігінде орыс тілді мектептер ашу немесе Президент Тоқаевтың бастамасымен Қазақстанда Ресейдің жетекші жоғары оқу орындарының филиалдарын ашу жөніндегі нақты жобалар, - деп айтты Құспан.
Мәжіліс депутаты тату көршілік және одақтастық туралы шарттың 10 жылдық мерейтойының басты нәтижесі – біздің барлық саладағы ынтымақтастығымыздың нақты мазмұны екенін атап өтті.
Мемлекет басшылары отын-энергетика саласындағы, әскери-техникалық саладағы, ғарыш саласындағы ынтымақтастықтың келешегін, Қазақстан аймақтарын газдандыру мәселелерін жан-жақты талқылағанын білемін. Әрине, биылғы ауыл шаруашылығына арналған 19-шы Өңіраралық ынтымақтастық форумын айтпай кетуге болмайды. Бүгінгі таңда біз қазіргі күрделі жаһандық геосаяси және геоэкономикалық жағдайда мемлекеттеріміз үшін азық-түлік қауіпсіздігінің қаншалықты маңызды екенін көріп отырмыз. Сондықтан бұл жерде ауыл шаруашылығы кооперациясының мәселелері ауыл шаруашылығының әртүрлі салаларын бір-бірімен толықтырып отыр, - деді ол.
Айгүл Құспан атап өткендей, іссапар нәтижесінде бірқатар құжатқа қол қойылды.
Депутат елдеріміздің парламенттері осындай сапарлар барысында Президенттер деңгейінде қол жеткізілген уағдаластықтарды жүзеге асыруға белсенді атсалысып келе жатқанына тоқталды.
Бізде палатааралық комиссия жұмыс істейді, онда депутаттар бас қосып, екіжақты ынтымақтастықтың барлық саласын талқылайды. Мемлекеттеріміздің Парламенттерінде достық топтары да бар, - деп айтты Айгүл Құспан.
