Сыртқы істер министрлігінде жыл сайын 2 шілдеде аталып өтетін Қазақстан Республикасының Дипломатиялық қызмет күні қарсаңында салтанатты жиын өтті, деп хабарлайды BAQ.KZ ведомствоға сілтеме жасап.
Іс-шараға дипломатиялық қызмет ардагерлері, Президент Әкімшілігінің, Үкімет Аппаратының өкілдері және ҚР СІМ Орталық аппаратының қызметкерлері қатысты.
Сыртқы істер министрі Мұрат Нұртілеу сыртқы саяси ведомствосының ұжымын кәсіби мерекемен құттықтап, дипломаттар өздерінің терең білімдері, өмірлік және кәсіби тәжірибелерінің арқасында мемлекетіміздің өркендеуі жолында қажырлы еңбек ететінін атап өтті.
Қазіргі уақытта Қазақстан өңірлік және жаһандық үдерістердің бел ортасында жүр. Еліміз үлкен халықаралық беделі мен өңірлік ықпалы бар мемлекет ретінде өз дамуының жаңа белестерін еңсеруде. Бұл қазақ дипломаттарының да күнделікті қажырлы еңбегінің нәтижесі, - деп мәлімдеді СІМ басшысы.
Дипломатиялық қызмет күніне орай бірқатар ардагерлер мен дипломаттар мемлекеттік наградалармен марапатталды, сондай-ақ ведомство қызметкерлеріне кезекті дипломатиялық дәрежелер берілді.
