Бразилияның бұрынғы президенті Жаир Болсонару мемлекеттік төңкеріс жасамақ болды деп айыпталуда, деп хабарлайды BAQ.KZ тілшісі ВВС агенттігінің мәліметіне сілтеме жасап.
Бразилияның бұрынғы президенті Жаир Болсонару елдің бас прокуроры тарапынан 2022 жылғы президенттік сайлауда жеңілгеннен кейін мемлекеттік төңкеріс жасауға әрекеттенді деген айыпқа тартылды.
69 жастағы саясаткерге өзінің қарсыласы Луис Инасиу Лула да Силваның президенттік қызметке кірісуіне кедергі келтіруге тырысқаны үшін бес түрлі айып тағылды.
Ол Луланы улау және Жоғарғы сот судьясы Александр де Мораесті атып өлтіру жоспарын дайындады деген күдікке ілінді.
Болсонару бұл айыптарды жоққа шығарып, өзін саяси қудалаудың құрбаны деп мәлімдеді.
Бұл істі енді Жоғарғы сот қарайды. Егер айыптаулар қабылданса, Болсонару мен тағы 33 адам ресми түрде айыпталып, сот алдына шығуы тиіс.
Бұрынғы президентке 2022 жылдың қазан айында өткен сайлауда электронды дауыс беру бюллетеньдері хакерлік шабуылдар мен алаяқтыққа осал деп жалған мәлімдеме жасап, Бразилия демократиясына нұқсан келтірді деген айып тағылғаннан кейін, оған сегіз жылға сайлауға түсуге тыйым салынған болатын.
Бұл сайлауда Болсонару жеңіліс тапты. Оны аз ғана дауыспен жеңген Луис Инасиу Лула да Силва президент болып сайланды.
Болсонару өзінің жеңілгенін көпшілік алдында мойындаған жоқ және Лула президенттік қызметіне кірісуіне екі күн қалғанда Бразилиядан АҚШ-қа кетіп қалды.
2023 жылғы 8 қаңтарда оның жақтастары Бразилия астанасындағы үкімет ғимараттарына басып кірді. Бірнеше ғимарат тоналды, ал полиция 1500 бүлікшіні қамауға алды.
Үш ай бұрын федералдық полиция Болсонарудың төңкеріс жасау жоспарын ұйымдастыруда басты рөл атқарғанын растайтын есеп жариялады. Онда ол әскери басшыларға Луланы билікке жібермеу туралы ұсыныс жасағаны көрсетілген.
Айыптау құжатында Болсонару бастаған қылмыстық ұйым демократиялық тәртіпке зиян келтіретін әрекеттерге жауапты деп көрсетілген.
Бұл дегеніміз, Болсонаруға қарсы сот процесі басталып, ол жақын арада сот алдына шығуы мүмкін.
Айыптардың бірі "қарулы қылмыстық ұйым" құруға қатысты деп танылып отыр. Бұл ұйымды Болсонару мен оның вице-президенттікке үміткері Вальтер Брага Нетту басқарды деп болжануда.
Бразилияның бас прокуроры Паулу Гонет Бранко Болсонару мен оның сыбайластары Луланы улау және Жоғарғы сот судьясы Александр де Мораесті өлтіру жоспарын әзірлегенін мәлімдеді.
Азаматтық және әскери тұлғалармен бірге олар 2022 жылғы президенттік сайлау нәтижелерін жүзеге асырмау үшін үйлестірілген әрекеттер жасады, - деді ол.
