«Бір шаңырақ астында». Елордада ерекше киіз үй құрылды

Елордада «Бір шаңырақ астында» атты киіз үй құру акциясы өтті, деп хабарлайды BAQ.KZ тілшісі.

Бұл іс-шара «Әділетті Қазақстан: бірлік, тұрақтылық, даму» күн тәртібінде өтіп жатқан Қазақстан халқы Ассамблеясының XXXII сессиясы, сондай-ақ 1 мамыр – Қазақстан халқының бірлігі күні аясында ұйымдастырылды.

Ұйымдастырушылардың айтуынша, іс-шара Қазақстан халқының бірлігін, үйлесімді этносаралық қатынастарды, туған ел, Отанды бейнелейтін қазақтың қасиетті символына құрмет көрсету мақсатында өткізілді.

Акция ортақ шаңырақ астында ұлттың бірлігін, Отан игілігі үшін қазақстандықтардың бірлескен еңбегін, әр адамның елдің дамуына қосқан үлесі мен атсалысуын білдіреді.

Акцияға өңірлерден келген 40-тан астам этнос өкілі қатысты. Олар киіз үйді көтеріп, қазақ тілінде әндер айтты. Елордадағы өзбек этномәдени орталығының төрағасы Шерзод Пулатов іс-шараның мәнін түсіндіріп берді.

Бәріміз бір отбасы болып, елімізде, яғни бір шаңырақтың астында бір отбасының баласындай тату-тәтті өмір сүріп келе жатырмыз. Әрине бұл ҚХА-ның жұмысының нәтижесі деп айтуға болады. Әр ұлттың басын қосып, бір халыққа айналдыру және бірлігімізді сақтап, нығайту осы атқарылған жұмыстардың жемісі. Бүгінгі күні біз бір-бірімізге құрметпен қараймыз. Мемлекеттік тілімізге жоғары мән береміз. Жастарымыздың арасында, әсіресе өзге ұлттардың арасында мемлекеттік тілді меңгеріп, жақсы лауазымдарда жұмыс істеп жатқандар бар, - деді ол.

Оның сөзінше, ҚХА атқарып жатқан жұмыстардың арқасында жастарды, жалпы қазақстандықтарды отансүйгіштікке тәрбиелеп жатыр.

«Бір шаңырақ астында» жобасы аясында ҚХА-ның бастамасымен шаңырақ көтеріліп отыр. Оны көтеру үшін еліміздің түкпір-түкпірінен әртүрлі ұлт өкілдерін жинап, олардың бастарын қосып, «шаңырағымыз бір» деген оймен киіз үйді тігіп отырмыз. Олар шаңырақты көтерген кезде игі тілектерін айтып, халқымызға жақсы тілектерін білдіріп жатыр. Мұндай іс-шара азаматтарға рухани тәрбие береді, - деп айтты Шерзод Пулатов.

Елордадағы өзбек этномәдени орталығының төрағасы Шерзод Пулатов айтуынша, осындай іс-шаралар еліміздің басқа да жерлерінде өтіп жатыр.

Сонымен қатар этнос өкілдері отандастарына бірлік, татулық тілеп, «Біз біргеміз!» деп ұрандатып, келе жатқан мерекемен құттықтады.

Салтанатты іс-шараға Парламентінің депутаттары, орталық және жергілікті атқарушы органдардың басшылары, ҚХА мүшелері, республикалық және өңірлік этномәдени бірлестіктердің төрағалары, ғылыми, шығармашылық зиялы қауым мен БАҚ өкілдері қатысты.