Нұр-Сұлтан, BAQ.KZ. Президенттің баспасөз хатшысы оған БАҚ өкілдері мемлекет басшысының "ҚР президентінің кейбір актілеріне өзгертулер мен толықтырулар енгізу туралы" Жарлығына түсіндірме беру жөнінде өтініш жасағанын айтты.
Оның айтуынша, кейбір бұқаралық ақпарат құралдарының өкілдері оған президенттің 2019 жылдың 9 қазанындағы "Қазақстан Республикасы президентінің кейбір актілеріне өзгертулер мен толықтырулар енгізу туралы" Жарлығына түсіндірме беру жөнінде өтініш жасаған.
"Осы құжат БАҚ беттерінде түрлі пайымдар мен пікірлер туғызды. Менің ойымша, бұл президенттің "кезекті" Жарлығы. Бұл құжатқа 2018 жылғы шілдеде қабылданған Қауіпсіздік кеңесі туралы жаңа заңның ережелеріне сәйкес қол қойылды. Аталған алқалы органның өкілеттілігін күшейту заңға сәйкес қарастырылады. Ал оны Қазақстанның Тұңғыш президенті – Елбасы Н.Назарбаев өмір бойы басқарады", - деп жазды Берік Уәли Facebook-тегі парақшасында.
Сөз арасында ол мемлекеттің лауазымды тұлғаларын тағайындау туралы келісім тәртібі іс жүзінде президенттің барлық кадрлық мәселелер бойынша өз бетінше шешім қабылдауына кедергі келтірмейтінін айтты.
"Елбасының өзі "Хабар" телеарнасына берген сұхбатында: "Тоқаев менімен ақылдасады. Бірақ өзі шешім қабылдайды" деген болатын. Президент Конституция бойынша еліміздің Жоғарғы Бас қолбасшысы және ол Үкіметті жасақтайды. Мемлекет басшысы – облыстардың және республикалық маңызы бар қалалардың әкімдерін жергілікті мәслихаттардың келісімдерімен тағайындайтын жоғары лауазымды тұлға. Сондай-ақ, президенттің құзыреті Қазақстан Республикасы Конституциясының 40-48-баптарында анық көрсетілген", - деп атап өтті президенттің бас хатшысы.
