Бектенов Президенттің атынан паралимпиада жүлдегерлері мен жаттықтырушыларды марапаттады

Бүгін Премьер-министр Олжас Бектенов Мемлекет басшысының атынан паралимпиада жүлдегерлері мен жаттықтырушыларына мемлекеттік наградаларды табыстады, деп хабарлайды BAQ.KZ тілшісі.

Үкімет басшысы спортшыларды жоғары жетістіктерімен құттықтады.

Биыл Қазақстанның Паралимпиада құрамасы тоғыз медаль жеңіп алып, тарихи рекорд орнатты, атап айтқанда, 2 алтын, 3 күміс және 4 қола медаль алды.

Мемлекет басшысы атап өткендей, паралимпиада спортшыларының жеңістері – қашанда мақсатқа ұмтылудың, табандылық пен өз күшіне сенімнің үлгісі. Ойындар қарсаңындағы кездесуімізден кейін бүкіл ел байрақты бәсекеде көрсеткен әрбір ойындарыңызды тамашалады, сіздердің жетістіктеріңіз біз үшін ерекше мақтаныш болды. Жыл өткен сайын ерекше жандардың спортқа қатысуы артып келе жатқаны бізді қуантады. Бүгінде елімізде ерекше қажеттіліктері бар 56 мыңнан астам қазақстандық дене шынықтырумен және спортпен жүйелі түрде айналысады. Сіздердің әрқайсыларыңыздың көрсеткен үлгілеріңіз көптеген адамды біздің паралимпиадашылар қатарына қосылуға ынталы ететініне сенімдімін. Үкімет спортшыларға қолайлы жағдай жасап, қолдау көрсету жұмыстарын күшейтуде, - деді Премьер-министр.

Олжас Бектенов спортшыларды Паралимпиадаға дайындауда маңызды рөл атқарған жаттықтырушылар мен тәлімгерлерге ерекше алғысын білдірді.

Паралимпиада чемпионы Давид Дегтярев спортшыларға жарыс кезінде қолдау көрсеткені үшін Қазақстан халқына рахметін айтты.

Мен Мемлекет басшысына және бүкіл Қазақстан халқына қолдау көрсеткені үшін алғысымды білдіргім келеді. Парижде өткен Паралимпиада ойындарында еліміздің намысын қорғау мен үшін үлкен мақтаныш сезімін тудырды. Біз Паралимпиада ойындарында жүлде жеңіп алу үшін көп еңбек еттік, біздің бапкерлеріміз жеңіске жету үшін бар шеберлігін салды. Мен еліміздің алғашқы екі дүркін Паралимпиада чемпионы болғаныма, Қазақстанның халықаралық аренадағы беделін нығайтуға үлес қоса алғаныма қуаныштымын. Алдымызда жаңа жеңістерге жету жолында үлкен жұмыс күтіп тұр. Біз мұнымен тоқтап қалмай, еліміздің игілігі үшін еңбек ете береміз, - деді пара пауэрлифтингтен екі дүркін Паралимпиада чемпионы Давид Дегтярев.

Сондай-ақ пара дзюдодан алтын медаль иегері Ақмарал Науатбек параспортшыларға елімізде ерекше жағдай жасалып жатқанын атап өтті.

Бүгін Мемлекет басшысының жарлығымен ІІІ дәрежелі Барыс орденімен марапатталдым, өте қуаныштымын. Біз Паралимпиада ойындарында әлемнің ең мықты спортшыларымен күш сынасып, Отанымызға пара дзюдодан тарихи алтынмен оралғаныма қуаншыштымын. Мемлекет тарапынан пара спортшыларға ерекше көңіл бөлінуде. Бүгінгі біздің жетістігіміз мүмкіндігі шектеулі жандарды жігерлендірді деп ойлаймын. Болашақта Қазақстан республикасының атын шығаруға болашақ чемпиондар біздің жолымызды жалғастыратынына сенемін, - деді пара дзюдодан алтын медаль иегері Ақмарал Науатбек.

ҚР Президентінің Жарлығымен I дәрежелі «Барыс» орденімен пара пауэрлифтингтен еліміздегі алғашқы екі дүркін Чемпион Дэвид Дегтярев, III дәрежелі «Барыс» орденімен Париждегі Паралимпиада ойындарының чемпионы және пара дзюдодан алғашқы алтын иегері Ақмарал Науатбек марапатталды.

Күміс медаль жеңіп алған мерген Еркін Ғаббасов, жүзуші Нұрдәулет Жұмағали және дзюдошы Шамей Ерғали «Парасат» орденінің иегерлері атанды.

«Құрмет» орденімен қола жүлдегерлер – Дастан Мұқашбеков, Зарина Райфова, Даяна Федосова және Жұрқамырза Шүкірбеков марапатталды.

Ұлттық құраманың бас жаттықтырушылары мен спортшылардың жеке бапкерлері де жоғары марапаттарға ие болды.

5 тәлімгер «Парасат» орденімен, 7 – «Құрмет» орденімен, 2 жаттықтырушы ҚР Президентінің Құрмет грамотасымен марапатталды: Юрий Колесников, Д. Дегтяревтің жеке жаттықтырушысы; Айдын Әнәпин, А. Науатбектің жеке жаттықтырушысы; Дәурен Оразов, Е. Шамейдің жеке жаттықтырушысы; Саттар Бейсембаев, Н. Жұмағалидың жеке жаттықтырушысы; Мүслім Сәрсембеков Е. Ғаббасовтың жеке жаттықтырушысы; Сергей Безгачев Д. Мұқашбековтің жеке жаттықтырушысы; Қанат Сағындық Д. Федосованың жеке жаттықтырушысы; Абылай Шунаев, пара оқ атудан ҚР Ұлттық құрамасының бас бапкері; Михаил Бурчалин, пара оқ атудан аға жаттықтырушы; Артур Томицкий, парапауэрлифтингтен ҚР Ұлттық құрама командасының бас бапкері; Жайдар Сайлаубаев, пара дзюдодан жаттықтырушы; Жандос Қиянов, пара дзюдодан ҚР Ұлттық құрама командасының бас бапкері; Айдар Картпаев, пара жүзуден ҚР Ұлттық құрама командасының бас бапкері; Тахир Мамашаев, пара жеңіл атлетикадан ҚР Ұлттық құрама командасының бас бапкері.

Айта кетейік, қазіргі уақытта елімізде 19 паралимпиадалық спорт түрі дамуда, оның ішінде бочча, голбол, отырып ойнайтын волейбол, 5х5 футбол, үстел теннисі, парадзюдо және т. б.