Нұр-Сұлтан, BAQ.KZ. Бүгін Премьер-министрдің орынбасары Роман Скляр мен Ресей Федерациясы Премьер-министрінің орынбасары Юрий Борисовтың төрағалығымен өткен жалпы отырыста «Байқоңыр» кешені бойынша жетінші үкіметаралық комиссия жұмысының қорытындысы шығарылды.
Бұл туралы Премьер-министрдің баспасөз қызметі хабарлады.
Келіссөз барысында тараптар «Байқоңыр» кешенін бірлесіп пайдалану және одан әрі дамыту перспективаларына, сондай-ақ Байқоңыр қаласының тіршілік деңгейін жақсартуға қатысты Қазақстан-Ресей ынтымақтастығының ағымдағы бағыттарын талқылады.
Үкіметаралық комиссия мүшелері «Бәйтерек» ғарыштық зымыран кешенін құрудың бірлескен жобасына ерекше назар аударды, шаралар тізбесі мен жүзеге асыру мерзімдері белгіленді. Кешен мүлкін ұтымды пайдалану, инфрақұрылым мен әлеуметтік саланы жаңғырту міндеттері де қарастырылған.
Жиынға қатысушылар аймақ пен ғарыш айлағының экологиялық қауіпсіздігін арттырудың маңыздылығына, кешеннің пайдаланылмай тұрған нысандарын жалға беруден шығару, есептен шығару және кәдеге жарату мәселелеріне жеке-жеке тоқталды.
Күн тәртібіндегі мәселелер бойынша сарапшылар өзара қолайлы шешімдер тапты, бұл ҮАК отырысының хаттамасында көрсетілген.
Кездесу соңында тараптар өзара іс-қимылдың жоғары деңгейін және «Байқоңыр» кешенінің стратегиялық бағыттарындағы міндеттерді табысты жүзеге асыру үшін қажетті әлеуеттің бар екенін атап өтті.
