Нұр-Сұлтан, BAQ.KZ тілшісі. «Nur Otan» партиясы төрағасының бірінші орынбасары Бауыржан Байбек Елбасының партия төрағасы өкілеттігін беру туралы шешіміне қатысты пікірін білдірді.
Оның сөзінше, билеуші партияның төрағасы лауазымын Қасым-Жомарт Кемелұлына тапсыру – бұл заңдылық, қазақстандық билік транзитіне толықтай сәйкес келетін шешім.
Қасым-Жомарт Кемелұлы «Nur Otan» құрылғаннан бастап оның басы-қасында. Ұзақ уақыт партияның басқарушы және маңызды шешімдер қабылдаушы органы – Саяси Кеңес Бюросының мүшесі. 2019 жылы Президент лауазымына кандидат ретінде Қасым-Жомарт Кемелұлы осы «Nur Otan»-нан ұсынылды. Соңғы парламент сайлауында партия Мемлекет басшысы өзі жария еткен сайлауалды бағдарламамен айқын жеңіске жетті. Сол берілген уәделерді орындау – билеуші партияның қазіргі уақыттағы басты міндеті, - деп атап өтті Бауыржан Байбек.
Ол Елбасы атағандай, қазір «Nur Otan» қоғамды Президентіміздің Мемлекеттік бағдары төңірегіне топтастыруы қажет екенін айтты.
Бұл шешім ел ішіндегі және сыртындағы барлық тараптарға биліктің тұтастығын және оның сабақтастық саясатына толықтай берік екендігін көрсетеді. Қосарланған билік туралы айтылған барлық негізсіз пікір мен орынсыз ұйғарымды теріске шығаратын қадам. Елбасының ел үшін және билеуші партия үшін осындай маңызды шешімді Тәуелсіздігіміздің 30 жылдығында қабылдауы үлкен символдық мәнге ие деп білемін, - деп айтты «Nur Otan» партиясы төрағасының бірінші орынбасары Бауыржан Байбек.
