Нұр-Сұлтан, BAQ.KZ. Бүгін «ҚазАқпарат» ХАА» АҚ-ның құрамындағы порталдар елордадағы Желілік паркіне өз шыршаларын отырғызды.
Атап айтатын болсақ, бүгіннен бастап Inform.kz, BAQ.KZ, Strategy2050.kz, Baigenews.kz, E-history.kz, El.kz және Adebiportal.kz порталдарының өз шыршалары бар. Енді әр портал өз шыршасына күнделікті күтім жасайтын болады.
Игі іске Есіл ауданының әкімі Берік Жәкенов қатысты.
Биылдыққа әлі тал отырғызбаппын. Сіздермен бірге осы Желілік саябағына шырша отырғызатын болдым. Көтеріп отырған бастамаларыңыз құтты болсын!, - деді Есіл ауданының әкімі Берік Жәкенов.
«ҚазАқпарат» ХАА» АҚ Басқарма төрағасы Асқар Умаровтың айтуынша, бұл бастама өз жалғасын табады.
Күз айларында қаланың сыртына барып дәл осылай тал отырғызатын боламыз. Бүгінде әкімдікпен келіссөз жүргізіліп жатыр. Ал осы саябақты арнайы өзіміздің кеңсемізге жақын болсын деп сұратып алдық, - деді төраға.
Айта кетейік, бүгінде Желілік паркі ашылмаған. Саябақтың жалпы аумағы 7 га жерді алып отыр. Ол қаланың жасыл белдеу аясындағы Ботаникалық саябақтың жалғасы. Саябақтың ресми ашылуы осы жылдың маусым айына жоспарланған.
Бүгінде саябаққа жасыл желек отырғызу жұмыстары қарқынды жүргізілуде. Сонымен қатар, балалар мен жастардың жас ерекшеліктеріне қарай бейімделген арайы алаңдар жасақталуда. Бұдан басқа велосипедшілер үшін арнайы жолақ төселген.
