Нұр-Сұлтан, BAQ.KZ. Атырау облысы әкімі Нұрлан Ноғаев Индер ауданындағы «Жас өркен» балалар жазғы лагерінде өтіп жатқан «Жастар Отанға» атты лагеріндегі жастармен кездесті, деп хабарлайды Атырау облысының Өңірлік коммуникациялар қызметі.
Жастар саясаты мәселелері басқармасы мен «Жастарды қолдау орталығы» қоғамдық қоры ұйымдастырып жатқан "Жастар Отанға" лагері екінші мәрте өткізілуде. Жоспар бойынша бұл лагерь жылына бір рет қана өткізіледі. Бұл лагерьде жас мемлекеттік қызметкерлер, жас мұғалімдер, өнер және спорт саласындағы жастар, сондай-ақ, студенттер мен тағы басқа әр саладағы жастар жиналған. Мұндағы басты мақсат - жастардың бойында жаңа қазақстандық жастың бейнесін қалыптастыру. Жастармен кездесуде аймақ басшысы жастардың сұрақтарына жауап беріп, өз тәжірибесімен бөлісті.«Ұйымдастырылып жатқан бұл лагерь өте тиімді шара деп есептеймін. Бүгінгі күнге дейін жастармен бірлесіп, көптеген шаралар жүзеге асып келеді. Өңірімізде 159 мың жас бар, соның ішінде 100 жас осы лагерьге қатысып отыр. Жастық шақтағы уақыттарыңызды тиімді пайдаланып, көбірек кітап оқып, шет тілдерін жетік меңгерулеріңіз керек. Миларыңызды жаттықтырып, оны керекті ақпарат пен біліммен жетілдірулеріңіз қажет. Жастардың салауатты өмір салтын ұстануына жəне сапалы білім алуына мемлекет тарапынан көптеген жағдайлар жасалуда», - дейді облыс басшысы Нұрлан Ноғаев.
Лагерьде жастар тек демалып қана қоймай, күні бойына семинар-тренингтерге қатысуда. Ұйымдастырушылардың айтуынша, тренингтер бір жақты емес. Семинар-тренингтер физикалық, интеллектуалдық және командалық топтық жұмыстарға бағытталған.
«Биыл лагерьге жастар тарапынан сұраныс көп болды. Себебі, алдыңғы жылы «Жастар Отанға» лагері Железноводск қаласында өтіп, облысымыздағы 80 жас қатысқан болатын. Биылғы лагерьге 100 адам қатысуда. Әр жылда 20 жастан қосып отырамыз деген жоспарымыз бар. Жастар бұл лагерьде бес күн болады», - дейді Атырау облыстық жастар саясаты мәселелері басқармасының басшысы Роллан Құспан.
