12 қарашада «Астана Операда» «Жібек жолы» халықаралық фестивалінің ашылуы өтеді. Қызыл кілемдегі белгілі қонақтар мен журналистер, жарқын шоу-бағдарлама мен М.Төлебаевтың көпшілік ұнататын «Біржан – Сара» операсы үш апталық фестивальді бастап береді, онда Италия, Германия, Чехия, Украина, Армения, Ресей, Беларусь және басқа да елдерден әртістер жиналады, деп хабарлады BAQ.KZ.
Фестиваль Мәдениет және спорт министрлігінің қолдауымен 6 желтоқсанға дейін созылады, көрермендердің назарына бүкіл әлемнен жұлдыздардың қатысуымен опера және балеттік спектакльдерден «музыкалық керуен» ұсынылады.
«Жібек жолы» бағдарламасы елорда тұрғындары мен қонақтарын міндетті түрде таңғалдырады.
Опера және балеттің ауқымды фестивалі еліміздің мәдени өміріндегі оқиға ғана емес, сондай-ақ ұлы өнерді бағалайтын барша жандар үшін нағыз мереке болмақ. Біз шындап дайындалдық, бағдарламаны толық ойластыра келе, театрдың шынайы рухын көрсету үшін танымал, жалындаған музыкамен қатар, ғаламат туындыларды да орындауды жөн көрдік. Сонымен қатар ұрпақтар сабақтастығын да көрсетуге тырыстық, сондықтан спектакльдерге сахна шеберлері де, жас солистер де жұмылдырылды, – деп атап өтті «Астана Опера» директоры, Қазақстанның еңбек сіңірген қайраткері Ғалым Ахмедьяров.
Сонымен, фестивальді ұлттық классика игілігі – М.Төлебаевтың «Біржан – Сара» операсы ашады, Біржан партиясын орындауға Мариин театрының солисі, Ресейдің еңбек сіңірген әртісі, Татарстанның Халық әртісі Ахмед Агади шақырылды. «Астана Операның» дәл осы операмен 2013 алғашқы театр маусымын ашқаны атап өтерлік жайт. Шындығында 10 жыл бұрын сахнада Қазақстан Республикасы Мемлекеттік сыйлығының лауреаты, Ресейдің Халық әртісі Юрий Александровтың қойылымы болған еді, алайда ол кезде де басты партияда теңдессіз тенор, Біржан партиясын үздік орындаушы Ахмед Агади жарқыраған болатын. Қазір әншіге бұл бейнені операның жаңа, атап айтсақ, Қазақстанның еңбек сіңірген қайраткері Асхат Маемиров пен кеңесші режиссер – Татарстан Республикасы Мемлекеттік сыйлығының лауреаты Михаил Панджавидзенің редакциясында (2018 жыл) ашуға тура келеді, онда қоюшылар операның жаңа оқылуын ұсынды, бұл қазақ классикасының сценография мен жекелеген кейіпкерлердің мінездерін қабылдау таптаурынын бұзады. Дирижер тұғырында – музыкалық редакция авторы, Қазақстанның еңбек сіңірген қайраткері Абзал Мұхитдин.
15-16 қарашада бағдарламаны Л.Минкустың «Дон Кихот» балеті жалғастырады. Өнер көрсетудің екінші күні Беларусь Үлкен театрының жұлдыздары Дмитрий Уксусников пен Людмила Хитрова қазақстандық көрерменге өз өнерлерін тарту етеді. Дирижер – Руслан Баймурзин.
19 қарашада Дж.Пуччинидің «Турандот» операсы орындалады, дирижер тұғырында – әлемге әйгілі маэстро Алан Бөрібаев. Калаф партиясында сахнаға Ованнес Айвазян (Армения) шығады. Өнер көрсетудің екінші күні – 20 қарашада Турандотты Оксана Крамарева (Украина-Германия) орындайды, Лиу – Либуше Санторисова (Чехия).
23-24 қарашада көрермендерге әлемнің танымал балеттерінің бірі – П.Чайковскийдің «Аққу көлі» ұсынылады. Бірінші күні шақырылған жұлдыздар – Анна Муромцева (Украина) мен Венгрия опера және балет театрының этуалі Герго Армин Балаши өнер көрсетеді. Дирижер – Джузеппе Акуавива (Италия).
29 қарашада екі бөлімді Балет кеші өтеді: Гала-балет пен В.Моцарттың музыкасына И.Килианның «Алты би» бірактілі балеті. Бағдарламаға солистер – Андрей Сорокин, Анастасия Мильяченко (Ресей), Дарья Сузи мен Хавьер Качейро Алеман (Германия) қатысады. Дирижер – Арман Оразғалиев.
2 желтоқсанда опера өнерінің жауһары – П.Чайковскийдің «Евгений Онегині» ұсынылады, дирижер – Алан Бөрібаев. Ленскийдің партиясын Александр Михнюк (Беларусь) орындаса, Ольганың бейнесін Дарья Горожанко (Украина) сомдайды.
3 желтоқсанда Евгений Онегин партиясында – Константин Бржинский (Ресей), Греминді Барсег Туманян (Армения) орындайды.
6 желтоқсанда «Жібек жолы» фестивалінің салтанатты жабылуы өтеді, көпшілікке таңғажайып Гала-концерт ұсынылады, дирижер тұғырында – Джузеппе Акуавива (Италия).
«Жібек жолы» халықаралық фестивалі музыкалық іс-шара шеңберінен аттап өтіп, Қазақстан мен алыс-жақын шет мемлекеттер арасындағы мәдени байланыс мағынасына ие болуға үндейді.
