Футболдан УЕФА Конференция лигасы бесінші турындағы қазақстандық «Астана» мен «Динамо Загреб» (Хорватия) кездесуінде шотландиялық төрешілер бригадасы қызмет атқарады, деп хабарлайды BAQ.KZ.
Кездесу 30 қарашада елорда уақытымен 21:30-да «Астана-Арена» стадионында басталып, «Qazsport» телеарнасынан тікелей эфирде көрсетіледі.
Ойын барысында шотландиялық төрешілер бригадасы қызмет атқарады. Бас төреші - Джон Битон. Оған Дэниэл Макфарлейн мен Алан Малвэнни көмекшілік жасайды. Қосалқы төреші де сол елдің өкілі - Мэтью Макдермид.
«Астана» командасы C тобында ойын көрсетеді. Төртінші турдан кейін «Виктория Пльзень» (Чехия) - 12 ұпай жинаса, «Балкани» (Косово) мен «Астана» - 4, «Динамо Загребте» - 3 ұпай бар.
Қазірге дейін астаналық клуб сырт алаңда «Динамо Загребке» 1:5, өз алаңында «Виктория Пльзеньге» 1:2 есебімен жеңілді. Сондай-ақ, «Балканиді» сырт алаңда 2:1 есебімен тізе бүктірсе, өз алаңында 0:0 есебімен тең ойнады.
Айта кетсек, «Астана» мен «Динамо Загреб» бұған дейін бес мәрте шеберлік байқасты. Барлығында хорватиялық клуб басым түсті.
