Ақтоғай ауданы Сарышаған кентінде жаңа спорттық-сауықтыру кешені ашылды, деп хабарлайды BAQ.KZ.
Спорт түрлеріне арналған залдары бар заманауи екі қабатты ғимарат "Ауыл – ел бесігі" арнайы жобасы бойынша салынды.
Оған бір уақытта 150 адам қатыса алады.
Баскетбол, волейбол және футболға арналған әмбебап зал, сондай-ақ қазақша күрес және дзюдо сабақтарына арналған күрес залы, бокс залы бар.
Сарышаған кентінде 5 мыңға жуық тұрғын тұрады. Олар кешеннің ашылуын күтті. Бұрын спортпен тек мектепте ғана айналысуға болатын еді, – дейді Ақтоғай ауданының дене шынықтыру және спорт бөлімінің басшысы Айдос Кішкентаев. – Жаңа ДСК-ға барлық инфрақұрылым жеткізілді. Қажетті спорттық жабдықтар бар. Жаттықтырушылар тобы да құрылған. Асық ату, жамбы ату, тоғызқұмалақ секцияларын ашу жоспарланған.
Бұл Ақтоғай ауданындағы екінші спорттық-сауықтыру кешені. Біріншісі Ақтоғай ауылында салынған. Алдағы уақытта Ақши, Абай, Қызыларай ауылдарында спорт залдарын, сондай-ақ Шашубай кентінде 100 орындық ДСК ашу жоспарлануда.
