Ақтөбе облысында көмірсутек шикізатын қайта өңдейтін мұнай-химия кешені салынады 

Ақтөбе облысында көмірсутек шикізатын қайта өңдейтін мұнай-химия кешені салынады 
512

Астана қаласында өткен «Investment Aktobe-2022» VII Халықаралық инвестициялық форумы барысында өңірде мұнай-химия саласын дамыту мәселесі айтылды. 
 

Ақтөбе облысының әкімі Ералы Тоғжанов пен «Рetrochemical enterprise «GEM» ЖШС компаниясының директоры Михаилас Барильчук Мұғалжар ауданының Жем қаласында мұнай-химия кешенін салу жөніндегі жобаны іске асырудағы өзара іс-қимыл туралы тиісті құжатқа қол қойды. 

Ауқымды жоба Мемлекет басшысының мұнай-химия секторын дамыту, қосылған құны жоғары өнім шығару туралы тапсырмасын орындау аясында іске асырылады. Инвестор 200 МВт көлемінде электр энергиясын өндіру жөніндегі энергетикалық блогы бар мұнай-химия өнімін өндіру үшін мұнай шикізаты мен газды қайта өңдеуді жүргізеді. Қуаттылығы жылына 5 млн. тонна болатын кәсіпорында 1000 жұмыс орны құрылады, - деп хабарлады Ақтөбе облысы әкімінің баспасөз қызметі.

«Рetrochemical enterprise «GEM» ЖШС жобаны іске асыруға әлемге әйгілі бірнеше компанияны, соның ішінде өнеркәсіптік және азаматтық құрылысқа мамандандырылған Lotte Engineering & Construction Co., Ltd компаниясын тартуға ниетті. 
 
2027 жылы пайдалануға берілетін жобаның құны - 1,5 трлн теңге. 
Ақтөбе облысының әкімдігі өз тарапынан жобаны іске асыруда жан-жақты қолдау көрсетуге дайын. 
 
«Investment Aktobe-2022» форумына 30-дан астам елдің дипломатиялық миссиялары, Үкімет мүшелері, ұлттық холдингтер мен компаниялардың, қаржы институттарының, трансұлттық корпорациялардың басшылары, ірі шетелдік және отандық бизнес өкілдері, ғалымдар мен сарапшылар қатысты. 
 
Халықаралық іс-шара өңірдің инвестициялық әлеуетін таныстыру, қолайлы инвестициялық имиджді ілгерілету, сондай-ақ Ақтөбе облысының экономикасына отандық және шетелдік инвестициялардың келуін одан әрі ынталандыру мақсатында ұйымдастырылды.
 

Қысқа да нұсқа. Жазылыңыз telegram - ға

Фото: ашық дереккөз
Өзгелердің жаңалығы