Диқаншылар көктемгі егіс жұмыстарына дайындық шараларына кірісті, деп хабарлайды BAQ.KZ.
Ақтөбе облысында ауыл шаруашылығы дақылдарының егіс алқабы — 756,5 мың гектар. 446,3 мың гектар жерге — дәнді, 62,2 гектарға — майлы, 11,2 мың гектарға картоп пен көкөніс-бақша дақылдарының дәні себілсе, 236,8 мың гектар аумаққа мал азығы егіледі.
Биылғы жылы көктемгі егіске ауыл шаруашылығы дақылдарының 49,9 мың тонна тұқымы қажет, бүгінгі таңда соның 45,8 мың тоннасы қамбаға салынды. Егіс жұмыстары шамамен мамыр айының ортасында басталады. Оған дейін шаруашылықтарды тұқыммен толық көлемінде қамтамасыз етуге мүмкіндік бар. Бұған қатысты барлық мәселенің жауабы шешілді. Майлы дақылдардың тұқымы жеткілікті.
Дәнді дақыл егісін қай кезден де көбірек салатын — Әйтеке би, Қарғалы, Мәртөк, Хромтау аудандары. Егістіктердің негізгі үлесі, яғни 76,2 пайызы осы аудандарда орналасқан. Облыс бойынша дәнді дақылдар түсімі гектарына 10,4 центнер болса, Қарғалы ауданындағы шаруалар 1 гектардан 14,7 центнер өнім алды. Қобда ауданы гектарынан - 11,8 центнер, ал Хромтау ауданы 11,7 центнер жинады, - деді облыстық ауыл шаруашылығы және жер қатынастары басқармасының бөлім басшысы Нұрбек Райымбаев.
Облыс бойынша көктемгі егіс жұмыстарына 7,2 мың тонна арзандатылған дизель отыны бөлінді.
Дизель отынын шаруашылықтарға жіберуші операторлар «АЗС-Лидер» ЖШС және «Батыс Жер» ЖШС болып анықталды. Шаруашылықтарға дизель отынын жіберу бағасы 1 литріне 249 теңге, бұл нарықтағы бағадан 15%-ға дейін арзан.
Жоспарға сәйкес, облыста көктемгі далалық жұмыстарын жүргізуге 1600 трактор, 100-ден астам егіс кешендері, 1300 тұқым себетін және 1600 жер өңдейтін техника жұмылдырылады.
Сондай-ақ, облыста 784,4 мың гектар алқапта химиялық өңдеу жұмыстарын жүргізу жоспарланып отыр. Бұл мәселе бойынша облыста және аудандарда арнайы штабтар құрылды. Биыл жүргізілетін химиялық өңдеу жұмыстарының жоспары бекітіліп, қажетті құралдарды мемлекеттік сатып алу жұмыстары жүргізіліп жатыр.
