Вашингтон Ресейге дипломатиялық қадамдар жасалған жағдайда да Украинаға қолдау айнымайтын болатынын айтып сендірді, деп хабарлайды BAQ.KZ.
Дональд Трамп әкімшілігі соғыс жағдайында Украинаға қолдау көрсетуді жалғастыруға ниетті. Бұл туралы Эстонияның Postimees телеарнасына берген сұхбатында Мемлекеттік департамент баспасөз хатшысының орынбасары Минион Хьюстон мәлімдеді. Оның сөзін 3 тамызда X әлеуметтік желісінде департаменттің баспасөз қызметінің жетекшісі Тэмми Брюс жариялады.
Бұл әкімшілік аймақтағы ұзақ мерзімді және тұрақты бейбітшілікті жақтайды. Біз Украинамен иық тірестіруді жалғастырғымыз келеді, өйткені Украина бейбіт тұрғындар мен маңызды инфрақұрылымға жасалған барлық шабуылдарды тоқтататын жан-жақты және толық атысты тоқтатуға шақырады, - деді Хьюстон.
Бұл мәлімдеме АҚШ президентінің арнайы өкілінің Мәскеуге алдағы сапары аясында жасалды. АҚШ-тың НАТО жанындағы тұрақты өкілі Мэтью Уитэкер WHO13 телеарнасында хабарлағандай, арнайы өкіл Стивен Уиткофф осы демалыс күндері Ресей астанасына келеді. Ол сапар "мүмкін жемісін берер" деген үмітін білдірді. Ресейге барар алдында Уиткофф 3 тамызда Тель-Авивте Газа секторында Хамас тарапынан кепілге алынғандардың отбасыларымен кездесулер өткізді. Ол АҚШ кепілге алынғандарды үйлеріне қайтаруға және содырларды жауапқа тартуға күш салады деп сендірді. Сапардың Таяу Шығыстағы кезеңінен кейін ол Мәскеуге келеді деп күтілуде, онда Украина мәселесі бойынша алдағы қадамдар талқылануы мүмкін.
Айта кетейік, бұған дейін Германия билігі онда тұратын немесе Германияға келуші украиналық босқындарға төленетін төлемді алып тастауды жоспарлап отырғанын жаздық.
