Нұр-Сұлтан, BAQ.KZ. Қорғаныс министрлігінде ведомство басшысы генерал-лейтенант Руслан Жақсылықовтың басшылығымен әскери мақсаттағы ақпараттық-коммуникациялық инфрақұрылымның бірыңғай операторын құру мәселесі жөнінде кеңес өтті, деп хабарлады министрліктің баспасөз қызметі.
Кеңеске Цифрлық даму, инновациялар және аэроғарыш өнеркәсібі министрі Бағдат Мусин, «Қазақстан Ғарыш Сапары» ҰК» АҚ және «Ghalam» ЖШС басшылығы, министрліктің құрылымдық бөлімшелерінің өкілдері қатысты.
Қорғаныс ведомствосынан министрдің орынбасары генерал-лейтенант Сұлтан Қамалетдинов, Стратегиялық даму, Ақпараттандыру, Байланыс, Мемлекеттік құпияларды қорғау департаменттерінің, Әскери-ғарыштық бағдарламалар орталығының бастықтары және «Қазақстан ГАЖ Орталығы» АҚ басшылығы қатысты.
Мемлекет басшысының тапсырмасын орындау үшін Қорғаныс министрлігіне әскери мақсаттағы ақпараттық-коммуникациялық инфрақұрылымның бірыңғай операторын құру тапсырылды. Қорғаныс министрлігі «Қазақстан Республикасының қорғанысы және Қарулы күштері туралы» Заңға түзетулер енгізді, – деді қорғаныс министрі.
Ел Президенті Халыққа Жолдауында ауқымды ақпараттық-телекоммуникациялық әлеуетті іске асыру қажеттігін атап өтті. Жаңа цифрлық дәуірде оның геосаяси маңызы зор. Қазақстан Еуразия кеңістігінің елеулі бөлігінде орталық цифрлық хабқа айналуға тиіс.
Генерал-лейтенант Руслан Жақсылықов атап өткендей, әскери мақсаттағы ақпараттық-коммуникациялық инфрақұрылым объектілерін құру, енгізу, дамыту, интеграциялау және жүйелік-техникалық қызмет көрсету бірыңғай операторды құрудағы мақсат болып табылады. Бірыңғай оператор ақпараттық-коммуникациялық технологиялар саласындағы талаптардың сақталуын, ақпараттық қауіпсіздікті, анықталған кемшіліктерге жедел ден қоюды және оларды уақтылы жою жөнінде шаралар қабылдауды, сондай-ақ ақпараттық-коммуникациялық қызметтер көрсету кезінде электрондық ақпараттық ресурстарды сақтау қауіпсіздігін, ақпараттық жүйелерге техникалық қызмет көрсетуді және оларды сүйемелдеуді қамтамасыз етеді.
Бірыңғай оператор ретінде «Қазақстан ГАЖ Орталығы» акционерлік қоғамын белгілеу ұсынылып отыр. Бұл орталық 15 жылдан астам уақыт бойы Қорғаныс министрлігінің ақпараттық жүйелерін техникалық тұрғыда қолдауды және сүйемелдеуді жүзеге асырып келеді.
Мұнан өзге, кеңес барысында жоғары жиілікте Жерді қашықтан зондтаумен қамту және пайдалануға беру, түсірілімдерді таратуға шектеулерді алып тастау жөніндегі жобаны іске асырудың техникалық шешімі мен тетігі бойынша мәселелер де талқыланды.
