Ақмола тұрғыны Грузиядан Toyota Highlander көлігін сатып алмақ болып, 3,1 млн теңгесінен айырылды

Ақмола облысы Астрахан ауданында тұратын ер адам автокөлік алаяқтығының құрбаны болды. Ол шетелден кроссовер алып беруге уәде еткен ауылдасына сеніп, 3,1 млн теңгесінен айырылған. 

Өңірдің полиция департаменті бұл оқиғаға қатысты 2026 жылғы 24 тамызда түсініктеме берді. Ведомство мәліметінше, оқиға 2024 жылдың қазан айында басталған.

Сол кезде оның ауылдасы Грузиядан Toyota Highlander көлігін тиімді бағамен сатып алуды ұсынған. Танысына сенген ер адам көлікті сатып алып, Қазақстанға жеткізу үшін оған 3,1 млн теңге берген.

Алайда уәде етілген автокөлік сатып алынбаған, ал көлік алуға берген ақшасын иесі қайтара алмаған, – деді ведомствоның баспасөз қызметі.

Алаяқтық фактісі бойынша полиция қылмыстық іс қозғады. Қазіргі уақытта тәртіп сақшылары қажетті тергеу амалдарын жүргізіп, оқиғаның барлық мән-жайын анықтап жатыр.