Пентагон басшысы ирандықтардың шабуылына қатысты деректермен бөлісті
Нұр-Сұлтан, BAQ.KZ. Ирактағы әскери базаларға Иран кем дегенде үш нүктеден 16 баллистикалық зымыран атты, оның 12-cі нысанаға дөп тиді. Пентагон басшысы Марк Эспер осындай мәлімдеме жасады, деп хабарлайды Рейтер.
Сарапшы мәлімдегендей, 11 зымыран Айн аль-Асад әуебазасына, тағы бір зымыран Эрбильдегі базаға тиген.
Пентагон басшысы хабарлағандай, шабуыл нәтижесінде тікұшақ, палаткалар мен тұрақтарға зақым келген.
Бүгінде америкалық әскерилер жауынгерлік әзірлікті сақтап, күшейтілген режимде жұмыс істеуде.
Естеріңізге сала кетейік, 8 қаңтарда Ислам революциясының жасақ корпусы (ИРЖК) генерал Касем Сулейманидің өліміне кек қайтару ретінде АҚШ нысандарына шабуыл жасады.
Иран АҚШ-тың әуе базаларына жасаған соққысынан кейін мәлімдеме жасады.
Иран операциясы "Сулейманиді азаптаушы" деп аталды. Иран АҚШ-қа көмектескен елге де шабуыл жасайтынын ескертті. Айта кетейік, 3 қаңтарға қараған түні Ирак астанасы Бағдаттағы халықаралық әуежай маңында бірнеше жарылыс болды.
АҚШ билігі жарылыс болған жердегі Иранмен байланысы бар екі нысанның соққысына қатысы бар екенін хабарлады. АҚШ қарулы күштері Ирактағы Иран генералының өлімінен кейін әскерін толық дайындап қойды. АҚШ соққысының салдарынан қайтыс болған ирандық генерал Касем Сулейманидің өлімінен кейін мұнай бағасы 2% қымбаттады.
Әлемдік БАҚ ирандық генерал Касим Сулейманиді жою туралы бұйрықты АҚШ президенті Дональд Трамптың өзі берді деген ақпарат таратты.
Иран жоғарғы көшбасшысының бас әскери кеңесшісі Хусейн Дехган CNN арнасына сұхбат бергенде генерал Касем Сулейманидің өлімі үшін кек алу үшін Иран америкалық әскери нысандарға шабуыл жасайтынын айтты.
Ал, 5 қаңтарда Иран ядролық келісімнен бас тартты. Иранның мемлекеттік телеарнасы Дональд Трамптың басы үшін 80 миллион доллар сыйақы беретіні туралы хабарлады, деп жазады EN24.
Өз кезегінде АҚШ президенті Дональд Трамп Ирактағы америкалық әскери базаға ирандықтардың жасаған шабуылынан кейін мәлімдеме жасады.
Bloomberg шабуылдан кейінгі америкалық базалардың суреттерін жариялады.
Айта кетейік, Иранның жоғарғы көшбасшысы аятолла Али Хаменеи елінің Ирактағы америкалық базаға жасаған шабуылын "шапалақ" деп атады.