Алматының Баум тоғайында қауіпті қураған ағаштар қаптаған: Ормандағы жағдай қандай?

Алматыдағы Баум тоғайында қураған ағаштар тұрғындардың өміріне қауіп төндіріп тұр. Жуырда осындай ағаштардың бірі 19 жастағы қыздың үстіне құлап, ол ауыр хәлде ауруханаға түсті. Оқиғадан кейін BAQ.KZ тілшісі Баум тоғайына барып, жағдайды көзбен көріп қайтты. Тоғайдың әр тұсында қураған, құлаудың аз-ақ алдында тұрған ағаштар көп.

Алматыда Баум тоғайында 19 жасар қыз Селин Абитованың үстіне ағаш құлап кеткен болатын. Қайғылы оқиға 27 маусым күні болған. Селиннің туыстары тоғайда құрғап, құлап түсуі мүмкін ағаштар көп екенін ескерткен болатын. 

Тоғай туралы 

Тоғайдың жалпы ауданы 137,7 гектар. Оңтүстіктен солтүстікке қарай ұзындығы 3,5 шақырым, ені 0,4 шақырымнан 0,9 шақырымға дейін созылады.

Тарихи тұрғыдан «Орман қазыналық тоғайы» 1877 жылы генерал-губернатор Колпаковскийдің бұйрығымен, қаланы шаңды дауылдардан, аптап ыстықтан және топырақ эрозиясынан қорғау мақсатында негізі қаланған.

Агроном-орманшы Эдуард Баумның басшылығымен қолдан жасалған орман құрылып, аумағы абаттандырылып, тоғайды суармалы сумен қамтамасыз ету үшін арықтардың ирригациялық желісі тартылды.

1894 жылы негізгі жұмыстар аяқталғаннан кейін тоғайға "Баум тоғайы" деген атау берілген. 

Тоғайда негізінен ұсақ жапырақты қарағаш және жылтыр қарағаш, сондай-ақ емен, қайың, шаған, жөке, үйеңкі және терек секілді жапырақты ағаштар көп. 

Тоғайдың фаунасында жануарлардың, құстардың, қосмекенділер мен бауырымен жорғалаушылардың 223 түрі бар.

Баум тоғайы ерекше қорғалатын табиғи аумақтар санатына жатады. Алайда тоғайдың ішінде тазалық жұмыстары көп жүргізілмейтіндей көрінді. 

Тоғай аумағына барған сәтімізде көзге бірден түскені - тамыры әлсіреп, кез келген сәтте құлауы мүмкін қисайған ағаштар өте көп.