Алматы, BAQ.KZ тілшісі. Бұл туралы Алматы қаласы Қоғамдық денсаулық басқармасының өкілі, Телемедицина орталығының басшысы Лаура Мырзағали онлайн брифингте айтты.
Бұған дейін қалалық Қоғамдық денсаулық сақтау басқармасының басшысы вакцина біту себепті 3-4 күнге екпе салу жұмысы тоқтатылғанын мәлімдеген. Бірақ бүгінгі брифингте вакцина салу әлі де жалғасып жатқаны айтылды.
Ақпанның 1 мен сәуірдің 5 аралығында 44 315 адам «Спутник V» вакцинасын салдырды. Оның ішінде 6 200 адам вакцинаның екі компонентін де салдырған. Ал сәуір айы басталғалы 28 713 адамға вакцина салынды. Кеше 4 764 адамға екпе салынды. Екпе салу жұмысы жалғасып жатыр, - деді Лаура Мырзағали.
Сондай-ақ ол сәуірдің 9 күні 5-траншпен қалаға 57 445 доза жеткізілетінін мәлімдеді.
Лаура Мырзағалидің айтуынша, Алматыда коронавирус жұқтыру жағдайы өсіп отыр. Бүгін таңертең 585 жағдай тіркелді, оның ішінде 490 жағдай симптом белгісі бар, 95-і симптомсыз.
Осы сәтте стационарда 3 146 науқас жатыр, бұл сан кешке дейін өзгеруі мүмкін. Бір тәулікте 309 науқас келіп түсті. Бүгінде бос төсек-орындар саны 1 080 құрайды. Науқастарды сырқатының деңгейіне қарай эшалон бойынша бөліп жатқызамыз. Сырқаты жеңіл түрде өтіп жатқандар үй карантинінде, яғни 5 251 адам дәрігерлердің бақылауында. Телемедицина орталығы барлық науқаспен байланысқа шығып, жағдайларын біліп отырады, - деді ол.
