Алматы, BAQ.KZ тілшісі. Алматы өндірушілері қала дүкендеріне әлеуметтік нанды жеткізуді үшін субсидия алады. Бұл туралы Өңірлік коммуникациялар қызметінде өткен брифингте Алматы қалалық Кәсіпкерлік және инвестициялар басқармасының басшысы Еркебұлан Оразалин мәлімдеді.
Оның айтуынша, «Азық-түлік корпорациясы» ҰК» АҚ қорынан қаладағы ұн тартатын кәсіпорындарға субсидияланған астықты жеткізу жалғасып жатыр. Әлеуметтік нанның сату бағасын бекіту үшін «Алматынан» ЖШС-не 150 млн теңге көлемінде айналым заемын бөлу жоспарланған.
Сонымен қатар жалпы әлеуметтік маңызы бар азық-түлік тауарларының бағасының өсуін тұрақтандыру мақсатында «Тоймарт» және «Магнум» сауда желілерімен келісім-шарттар ұзартылды. Small желісіне, сондай-ақ «Когер» ЖШС-не жұмыртқаны арзандатылған бағамен сатуға қосымша қаражат бағытталды,-деді ол.
Е.Оразалин Алматыда «В», «С» класты дүкендердегі бағаларға мониторинг жүргізіліп жатқанын, сондай-ақ ірі дистрибьюторлар мен өндірушілерден тікелей көтерме бағамен бакалея өнімдерін тікелей жеткізу ұйымдастырылғанын хабарлады. Жеткізумен 1 мыңнан астам «үй жанындағы» дүкендер қамтылған, онда ӘМАТ сегіз атауы бойынша (жұмыртқа, қант, күріш, ұн, күнбағыс майы, қарақұмық, макарон, тұз) шамамен 1,5 мың тонна өнім тиелген.
