BAQ.KZ тілшісі әлемде соңғы тәулікте болған оқиғаларға шолу жасап, жария болған жаңалықтар топтамасын ұсынады.
Францияда екі пойыз соқтығысты
Сенбі, 11 қаңтарда, Францияның Страсбург орталық станциясында екі пойыз соқтығысты.
BFM TV мәліметінше, апаттан 20-ға жуық адам зардап шеккен.
Оқиға «Орталық вокзал» аялдамасы маңында бағыттарды ауыстыру кезіндегі қателікке байланысты болған. Құтқару қызметтерінің мәліметінше, жолаушылар орташа дәрежеде жарақат алған. Оқиға орнында өрт сөндірушілер жұмыс істеп, апат салдарын жою үшін ресурстар жұмылдырылған.
Билік жедел қызметтерге кедергі келтірмес үшін Де-Аль алаңына, вокзалға және Президент Уилсон бульварына жақындамауға кеңес береді.
Лос-Анджелестегі өрт өршіп барады
Лос-Анджелестің біраз бөлігін шарпыған орман өрті желдің салдарынан бағытын өзгертіп, жағдай қиындай түскен.
REUTERS
ВВС агенттігінің мәліметінше, жағдайдың күрделене түсуі 153 000 адамды дереу эвакуациялауға мәжбүрледі. Сонымен қатар тағы 166 000 адамға үйлерін тастап кетуге дайын болу туралы ескертілді.
Қазіргі уақытта қала жалпы ауданы 15 мың гектарды құрайтын бес бөлек өртпен қоршалған. Тағы үш ошағы оқшауланған. Он мыңдаған адам қазірдің өзінде үйлерін тастап кетуге мәжбүр болды. Өрт салдарынан 12 мың ғимарат қатты зақымданған немесе толықтай қираған. Солардың ішінде әйгілі актерлердің де тұрғын үйлері күлге айналды.
Бірнеше Голливуд жұлдыздары, соның ішінде Энтони Хопкинс, Пэрис Хилтон және Билли Кристалдар үйлерінен айырылды. Соңғысының үйсіз қалғаны туралы танымал актер Мел Гибсон хабарлады, - деп жазды ВВС.
Өрт салдарынан кем дегенде 16 адамның қаза тапқаны белгілі болды. Алайда өрт бақылауға алынып, өрт сөндірушілер үйлерді аралауға кіріскеннен кейін қаза тапқандар саны артуы мүмкін.
Кореядағы ұшақ апаты: қара жәшіктерде ақпарат жазылмаған
Оңтүстік Кореядағы ең үлкен ұшақ апатын тергеп жатқан мамандар "қара жәшіктердегі" ақпарат Бангкоктан ұшқан Jeju Air 7C 2216 рейсінің 29 желтоқсанда Муан әуежайында не себепті құлағанын анықтауға көмектеседі деп үміттенген.
Алайда апатқа ұшыраған Boeing 737-800 ұшағының регистраторлары апатқа төрт минут қалғанда жазуды тоқтатқан.
edition.cnn.com
Министрлік мәлімдемесінде жазбаның тоқтатылуының себебі әлі белгісіз.
CVR және FDR деректері әуе апатын тергеу үшін маңызды, бірақ тергеу әртүрлі деректер көздерін талдау арқылы жүргізіледі, сондықтан біз апаттың себебін дәл анықтау үшін бар күш-жігерімізді салуды жоспарлап отырмыз, - деді министрлік.
Моңғолия ереуілдеп жатыр
Моңғолия астанасында үлкен митинг өтті, үш мыңнан аса адам мәселені шеше алмайтын үкіметтің отставкаға кетуін талап етуде.
Митингке қатысушылар 2025 жылдың 11 қаңтарында Ұлан-Батордың орталық алаңына жиналды. Олар сыбайлас жемқорлықпен, астанадағы көк түтінмен және кептеліспен күресу, сондай-ақ салықты азайту бойынша шаралар қабылдауды талап етті, - деп жазады жергілікті news.mn жаңалықтар сайты.
Видеодан кадр. newspress
Митингке байланысты алаңды басып өтетін 15 бағыттағы автобус жұмысын тоқтатқан.
Митинг кем дегенде 10 сағатқа созылды. Басылымның хабарлауынша, анда-санда наразылық білдірушілер Сухе-батор алаңында орналасқан үкімет сарайына шабуыл жасамақ болған, бірақ полиция мен арнайы күштер оларды тықсыра қуумен болған.
