Қазақстан Республикасы Сыртқы істер министрінің орынбасары Әділ Тұрсынов БҰҰ Бас Ассамблеясының 77-ші сессиясы аясында өткен Ислам ынтымақтастығы ұйымына мүше мемлекеттердің жыл сайынғы үйлестіру кездесуіне қатысты, деп хабарлайды BAQ.KZ.
Іс-шара барысында ислам әлемін дамытудың өзекті мәселелері мен перспективалары қаралды. Экономика, сауда, көлік, мәдениет, ғылым және технологиялар, туризм және денсаулық сақтау, ақпараттық технологиялар, су ресурстары, қоршаған орта және климаттың өзгеруі салаларындағы ынтымақтастықты дамыту мәселелері бойынша пікір алмасылды.
Қазақстандық дипломат өз сөзінде мұсылман үмбетінің бірқатар өңірлері мен елдерінде бейбітшілік пен тұрақтылықты қамтамасыз ету мәселелеріне ИЫҰ белсенді қатысуының маңыздылығын атап өтті, ғылым мен технология саласындағы 15 жетекші мұсылман елін біріктіретін «ИЫҰ-15» тобын құру жөніндегі қазақстандық бастаманың өзектілігін, сондай-ақ азық-түлік қауіпсіздігі жөніндегі Ислам ұйымының рөлінің өскенін атап өтті.
Үйлестіру кездесуінің ұйымдастырушысы ИЫҰ Бас хатшылығының үйлестіруімен Нью-Йорк қаласындағы БҰҰ жанындағы ИЫҰ тұрақты миссиясы болды.
Анықтама: Ислам ынтымақтастығы ұйымы (2011 жылға дейін – Ислам Конференциясы ұйымы) 1969 жылы құрылған. ИЫҰ Бас хатшылығы Джидда қаласында (Сауд Арабиясы Корольдігі) орналасқан.
Қазіргі уақытта ИЫҰ жалпы халқы 1,5 млрд адамнан асатын 57 мүше мемлекет құрайды және БҰҰ-дан кейінгі көлемі бойынша екінші халықаралық ұйым болып табылады. Қазақстан ұйымға 1995 жылғы желтоқсанда мүше болды.
