Елімізде тұмауға қарсы иммундау науқаны 3 қазанда басталады, деп хабарлайды BAQ.KZ.
Бұл туралы брифингте ҚР Денсаулық сақтау вице-министрі – ҚР Бас мемлекеттік санитарлық дәрігері Айжан Есмағамбетова мәлімдеді.
Мен 19 қыркүйекте ағымдағы эпидмаусымға Тұмау мен ЖРВИ бойынша санитариялық-профилактикалық, санитариялық-эпидемияға қарсы іс-шараларды жүргізу туралы қаулыға қол қойдым. Қаулыға сәйкес медициналық ұйымдардың ағымдағы жылғы 3 қазаннан бастап тұмауға қарсы иммундау кампаниясын жүргізуге, тұмаумен және ЖРВИ-мен ауыратын науқастарды қабылдауға дайындығы, сондай-ақ зертханалардың тұмау мен басқа да ЖРВИ-ге зертханалық зерттеу жүргізуге дайындығы қамтамасыз етілді, - деді Айжан Есмағамбетова.
Вице-министр алдағы эпидемиялық маусымда Дүниежүзілік денсаулық сақтау ұйымының мәліметтері бойынша вирустың үш штамы өзекті болады - A (H1N1), A (H3N2) және B, олар 2021/2022 эпидмаусымда вакцина құрамына енгізілгенін атап өтті.
Республикада жыл сайын тұмау вирусының айналымы қараша айынан басталып, сәуір айының ортасына дейін созылады. Өткен жылы республикада ЖРВИ-мен 3,9 млн адам ауырды, 2019-2020 жылғы эпидмаусыммен салыстырғанда республика бойынша сырқаттанушылық 1,3 есе өсті, - деді Есмағамбетова.
Бас мемлекеттік дәрігер аурудың алдын алудың ең тиімді әдісі вакцинация екенін атап өтті.
Аурудың алдын алудың ең тиімді әдісі - вакцинация. Қауіпсіз және тиімді вакциналар 60 жылдан астам уақыт бойы қолданылып келеді. Ағымдағы жылы бюджет қаражатына 2,1 млрд теңгеге 2,3 млн доза "ГРИППОЛ +" вакцинасы сатып алынды. Вакцина құрамында алдағы маусымға қарсы штамдар бар. Бұл ДДСҰ ұсынған 10% - дан республиканың жалпы халқының кемінде 12% – ын қамтуға мүмкіндік береді. Мемлекеттік бюджет қаражаты есебінен вакцинацияны халықтың анағұрлым осал топтары алатынын ескерткім келеді, - деп хабарлады Есмағамбетова.
Бұл санатқа медицина қызметкерлері; медициналық ұйымдарда диспансерлік есепте тұрған балалар; жетім балалар мен ата-анасының қамқорлығынсыз қалған балаларға арналған білім беру ұйымдарынан, сәбилер үйлерінен және эпидемиологиялық көрсетілімдер бойынша балалар жатады.
Сондай-ақ, жұмыс берушілер мен халықтың жеке қаражаты есебінен вакцинация жүргізіледі. Тұмауға қарсы ақылы егу жеке вакцинация орталықтарында, тұрғылықты жері бойынша емханалардың егу кабинеттерінде жүргізіледі. Тұмауға қарсы вакцинация жүргізетін медициналық мекемелердің мекен-жайларын тұрғылықты жері бойынша аумақтық санитарлық-эпидемиологиялық бақылау департаменттерінен және денсаулық сақтау басқармаларынан білуге болады.
Бюджет қаражатына сатып алынған "ГРИППОЛ +" вакцинасынан басқа, Қазақстанда тұмауға қарсы тағы 7 вакцина тіркелген, оның ішінде 3 ресейлік вакцина - Гриппол квадри, Ультрикс квадри, Флю-М, 2 голландиялық өндіріс – Инфлювак Тетра және Инфлювак, француздық Ваксигрип Тетра вакцинасы және Синовак Биотек өндірісіндегі қытайлық тұмауға қарсы вакцина.
Тұмау эпидемиялары жыл сайын қайта оралатын мәселе және қоғамдық денсаулық сақтау саласындағы елеулі проблема болып табылады. Адамдардың көбі тұмауды ауыр сырқат ретінде қабылдамайды, Дүниежүзілік денсаулық сақтау ұйымының деректеріне сәйкес жыл сайын тұмау мен ЖРВИ-дің 5 миллионға дейін ауыр жағдайы тіркеледі және респирторлық аурулардан 650 мыңға дейін адам қайтыс болады, - деп атап өтті А.Есмагамбетова.
Тұмау кенеттен басталады, дененің қызуы тез көтеріледі. Организмнің айқын интоксикациясы байқалады, оның белгілері: қалтырау, әлсіздік, бұлшықеттің және бастың ауыруы, бүкіл дененің сырқырауы, кеуденің артқы жағы ауырып, құрғақ жөтел пайда болады.
Басқа вирустық инфекция (ЖРВИ, аденовирустық инфекция және басқалары) кезінде әдетте катаральдық белгілер басым болады, яғни мұрын бітеледі, тамақ ауырады, содан кейін осы катаральдық белгілерімен қатар дене қызуы көтеріледі.
Айта кетері, жыл сайын әлем халқының 15% - ы тұмаумен ауырады және тұмау әлеуметтік маңыздылығы бойынша барлық аурулар арасында бірінші орында тұр.
"Қорытындылай келе, сіздердің назарларыңызды тағы да вакцинацияны уақтылы алу керектігіне, сондай - ақ қарапайым алдын алу шараларын сақтау қажеттігіне аударғым келеді,- деп атап өтті вице-министр.
Осылайша, ол адамдар көп жиналатын орындарға, әсіресе жабық үй-жайларға баруды шектеу; үй-жайларды үнемі желдету, дезинфекциялық режимді күшейту; ауру адамдармен байланысын шектеу; тұмау және ЖРВИ белгілері пайда болған кезде балаларды үйде қалдыру және ұйымдастырылған ұжымдарға (мектепке дейінгі ұйымдар, мектептер) жібермеу; тұмаудың өзі емес, тұмау мен жедел респираторлық инфекциялардың асқынуы қауіпті болғандықтан медициналық көмекке уақтылы жүгіну қажеттігі сияқты алдын алу шараларын еске салды.
