Әбілқасымова: Жаңа корей банкінің пайда болуынан бірінші кезекте клиенттер ұтады

13 Маусым 2024, 11:50
1150
Бөлісу:
Әбілқасымова: Жаңа корей банкінің пайда болуынан бірінші кезекте клиенттер ұтады
Фото: Қаржы нарығын реттеу және дамыту агенттігі

Мәдина Әбілқасымова шетелдік банктің жоспарларына түсініктеме берді, деп хабарлайды BAQ.KZ. 

Қаржы нарығын реттеу және дамыту агенттігінің төрағасы атап өткендей, микроқаржы ұйымының екінші деңгейдегі банкке айналуы Қазақстанда алғаш рет орын алуда. Бұл – бүкіл нарық үшін маңызды оқиға.

Мұндай ауысуды жүзеге асыруға мүмкіндік беретін тиісті заңнамалық базаны біз өткен жылы қабылдадық. Бұл процестің ерекшелігі – микроқаржы ұйымының өз қызметін тоқтатудың қажеті жоқ және банктік лицензия алғанға дейінгі кезеңде микроқаржы ұйымы операцияларды стандартты режимде жалғастырады. Қаржы реттеушісі ретінде біз осындай бірінші рұқсатты бердік және бұл халықаралық қаржы конгломератын білдіретін шетелдік банк екендігі қуантады. Бұл – бүкіл нарық үшін маңызды оқиға, - деді ол.

Әбілқасымованың сөзінше, BNK Finance Kazakhstan кореялық BNK Financial Group Inc құрылымына кіреді. 

Ол $129 млрд мөлшеріндегі активтері бар аса ірі қаржы конгломераты болып табылады. BNK Financial Group Inc тобының құрылымына 7 еншілес ұйым, оның ішінде 2 банк (Busan Bank және Kyongnam Bank) және 4 инвестициялық компания (BNK Capital, BNK Venture Capital, BNK Securities, BNK Asset Management) кіреді. Топтың әр түрлі елдерде, соның ішінде Қытайда, Үндістанда, Вьетнамда активтері бар. Топқа кіретін екі Kyongnam Bank (активтері $37,5 млрд) және Busan Bank (активтері $57,3 млрд) банктерінің 300-ден астам филиалы және «А2» халықаралық рейтингтері бар, - деді агенттік басшысы.

Ол BNK Finance Kazakhstan МҚҰ Агенттіктің 2021 жылғы сәуірден бастап лицензиясына ие болғанын айтты. 

Тікелей МҚҰ акционері $6,7 млрд мөлшеріндегі активтері бар BNK Capital болып табылады. Үш жыл ішінде Қазақстанда МҚҰ активтері 5 есеге ұлғайып, 20,3 млрд теңгені құрады. Кредиттік портфель 6 есеге ұлғайып, 18,8 млрд теңгеге жетті. МҚҰ кредиттік портфельдің жоғары сапасына ие, NPL90+ деңгейі кредиттік портфельдің 4,3%-ын құрайды, - деп түсіндірді ол.

Бүгінгі күні Оңтүстік Корея - Қазақстанның маңызды сауда серіктесі және жетекші шетелдік инвесторлардың бірі саналады. 2005 жылдан бері Қазақстанға Кореядан тартылған инвестициялар көлемі 9,6 млрд АҚШ долларын құрады. 2023 жылдың қорытындысы бойынша тауар айналымы 6,0 млрд АҚШ долларын құраған Оңтүстік Корея Қазақстанның көлемі жөнінен 4-ші сауда әріптесі болып табылады.

Мәдина Әбілқасымова Кореяның еншілес банкінің қызметі бизнес субъектілерінің сауданы қаржыландыру құралдарына, экспорттық-импорттық операцияларды кредиттеуге, ұлттық валютада есеп айырысу тетіктеріне қол жеткізуі арқылы өзара сауданың өсуі үшін жаңа мүмкіндіктерді қамтамасыз ететініне сенімді екенін атап өтті.

BNK Finance Kazakhstan-ның жаңа рөлі мен мәртебесі банк секторындағы бәсекелестікті күшейтеді. Жаңа банктің пайда болуынан бірінші кезекте клиенттер, қаржылық қызметтерді тұтынушылар ұтады. Шетелдік банк халықаралық топтың үздік корпоративтік стандарттарына сәйкес қаржылық қызметтер көрсетеді. Жаңа ойыншының үлкен және өршіл жоспарлары бар. Шетелдік банк ШОБ-ты кредиттеуді, корпоративтік кредиттеуді, сауда-саттықты қаржыландыруды, қаржы лизингін, жобалық қаржыландыруды және бөлшек бизнесті қаржыландыруды жоспарлап отыр, - деп мәлімдеді ҚР Қаржы нарығын реттеу және дамыту агенттігінің төрағасы.

Еске салсақ, еліміздегі корейлік Bank Finance Kazakhstan екінші деңгейлі банкке айналатын болды. Бұл туралы Ақордада Оңтүстік Корея Президенті Юн Сок Ёльмен келіссөздерден кейінгі бірлескен мәлімдеме барысында Мемлекет басшысы Қасым-Жомарт Тоқаев айтты.

Өзгелердің жаңалығы