Нұр-Сұлтан, BAQ.KZ. "Қазгидромет" РМК 29 желтоқсанға арналған ауа райы болжамын жариялайды.
Атлантикалық циклонның әсерінен республиканың солтүстік-батысында, солтүстігінде, орталығы мен шығысында қар жауады. Қалған аумағында антициклонның әсерінен жауын-шашынсыз ауа райы сақталады. Республиканың кей жерінде тұман, желдің күшеюі және жаяу бұрқасын күтіледі.
Солтүстік Қазақстан облысында кей жерде тұман, жаяу бұрқасын, түнде 15-20 м/с жел соғады.
Қостанай, Ақмола, күндіз Павлодар облыстарында – кей жерде жаяу бұрқасын, 15-20 м/с желдің күшейюі күтіледі.
Алматы облысында кей жерде тұман, Жалаңашкөл аймағында 17-22 м/с желдің күшейюі күтіледі.
Күндіз Шығыс Қазақстан облысында кей жерде жаяу бұрқасын, жел 15-20 м/с, Жарма аймағында екпіні 23 м/с күтіледі.
Жамбыл, Түркістан, Қызылорда, Маңғыстау, Атырау, Батыс Қазақстан, түнде Ақтөбе облыстарында кей жерде тұман күтіледі. Алматы облысында түнде қатты аяз күтіледі.
