Бұл туралы Ұлытау облысының әкімі Берік Әбдіғалиұлы мәлімдеді, деп хабарлайды BAQ.KZ тілшісі.
Соңғы 25 жылда Жезқазған қаласында бір ғана жаңа ғимарат салынды, ол 2021 жылы Мемлекет басшысы ашқан мектеп-интернат. Өкінішке қарай Қарағанды облысы кезінде басқа ештеңе соғылмады. Сол мектеп-интернаттың өзі толық аяқталмай, биыл 200 орындық жатақхана құрлысын бастап жатырмыз, - деді Берік Әбдіғалиұлы өңірде өткен баспасөз мәслихатында.
Сонымен қатар оның мәлімдеуінше, «Жайлы мектеп» ұлттық бағдарламасы бойынша Қабанбай батыр кентінде 300 орындық мектеп құрылысы жуырда басталды.
Осыған қоса айтарым, 6 ірі әлеуметтік саладағы нысандар құрылысы біраз жылдан бері аяқталмаған күйінде қалып отыр: Теректі станциясындағы 80 орындық мектеп, Жезқазған және Сәтбаев қалаларындағы 2 балабақша, Сәтбаев қаласындағы Оқушылар сарайы, Ұлытау ауданының Жезді ауылындағы 160 орындық және Жезқазған қаласындағы 310 орындық дене шынықтыру-сауықтыру кешені. Барлығын облыстық бюджет қаражаты есебінен аяқтайтын боламыз, - деді Ұлытау облысының әкімі.
